طبعاً كانت سنة ولا كل السنين ، اكنه خيال علمي و انا عمري في حياتي ما حبيت افلام الخيال العلمي ، كنت دايماً بحس انها اوفر اوي و الخيال بيشطح فيها لدرجة هبلة .
قال ايه وباء و هيفتك بسكان الأرض و اوعي وشك و الكرة الأرضية هيموت ملايين من سكانها بسبب ڤيروس و هوپ احداث الفيلم تتلاحق و البطل في الفيلم دكتور عبقري يكتشف المصل و يتم انقاذ البشرية و النور يولع و نخرج من السينما .
هي دي بالضبط سنة ٢٠٢٠ بس الفرق انه مش خيال علمي و اننا لسة بنحاول ننقذ البشرية.
السنة من اولها شادّة حيلها علينا : يناير حصلت حرايق الغابات في استراليا و ملايين الحيوانات البرية ماتت ، و الصين تعلن عن تفشي وباء كورونا المستجد ، في فبراير الكورونا تجتاح العالم و الحجر المنزلي للعالم كله تقريباً و الناس قاعدة في بيوتها محجورة او عيانة او في المستشفيات. في مارس الحرم المكي يُغلق و بابا الفاتيكان يقيم قداس الصلوات لوحده. في ابريل يتم عمل مقابر جماعية في البرازيل للوفيات بالكورونا و في مايو امريكا تتصدر دول العالم كله في اعداد الكورونا و كل الشهور علي الحال دة …كورونا في رمضان و في العيد الصغير و العيد الكبير و في الصيف كله و في الربيع و الخريف و ها نحن ذا في الشتاء.
حصل احداث تانية هزت العالم في ٢٠٢٠ بس مش زي الكورونا – زي خروج انجلترا من الأتحاد الأوروپي و انزال علمها ، مثول ترامپ امام مجلس الشيوخ بتهمة استغلال السلطات ، وفاة المواطن الأمريكي الأسود جورچ فلويد علي يد ٤ من رجال الشرطة البيض.
في كل الأحداث السابقة دي …احنا كنا في البيت بالپجاما.
و مش بس كدة …احنا لبسنا الپجامات الصيفي و الشتوي و اشترينا مقاسات مختلفة كمان علشان تغيرات الوزن الي طرأت علينا
احنا غالباً هنستقبل السنة الجديدة برضه بالپجاما …انها بلاشك سنة الپجاما.
و الطريف ان احنا working from home معظمنا كان بيبقي لابس نص الپجاما التحتاني و مطقم معاه لبس خروج للنص الفوقاني.
الواحد في ٢٠٢٠ حسّ بقيمة بحاجات مكانش عمره يتخيلها ، اننا نعد جمب بعض و نسلم علي بعض و نخرج نشوف الدنيا و الناس .
في ٢٠٢٠ كل انسان عرف قيمته الحقيقية و ان الموضوع مش فلوس و ڤلل و عربيات و القاب ، الي عنده الحاجات دي زيه زي الي معندوش .
الواحد عدت عليه سنة بقي بيتلكك علشان يفرح بأقل حاجة ، سقف توقعاتنا في عام الپجاما اتضحضر جداً و بقينا بننبسط بحاجات عادية او اقل من العادية
يا اخي الواحد كان عايش في نعم مش حاسس بيها ، نعمة انك تقدر تمشي و انت مطمن او انك تخرج تشوف اصحابك
و يتبقي اكبر درس في هذا العام القاسي انه مفيش قوي عظمي و لا بلاد اقوي من بلاد ، كل الدول العظمي و الغير عظمي ڤيروس صغير شقلب حالهم ، القوي العظمي الوحيدة هو ربنا سبحانه و تعالي .
كل سنة لما بكتب پوست السنة الجديدة بيبقي عندي زخم كبير بالأحداث و الحاجات الي حصلت و الأمنيات الجديدة للعام التالي و كان بيبقي في احتفالات و خروجات و ميري كريسماس و هاپي نيو يير و كدة …السنة دي اقصي حاجة هعملها انيّ اجيب پجاما جديدة .
عندي امنية وحيدة : ان ربنا يرفع عنا الوباء دة و ان يحفظ احبتنا و يا رب عايزين نلبس هدوم مش پجامات و نتكشف علي بشر زي زمان .
اي حد قال علي اي سنة فاتت انها صعبة اكيد في ٢٠٢٠ هو تأكد انها كانت سنة لعب عيال في الصعوبة …٢٠٢٠ هي ليڤل الوحش و يا رب تعدي و تخلص بكل كوارثها و تكون ٢٠٢١ أحن علينا ….احنا اتنفخنا الحقيقية.
كل سنة و انتم طيبين و عام سعيد و لكل حبايبي الي بيحتفلوا بالكريسماس و راس السنة احب اقولهم ميري كريسماس وهاپي نيو يير و هاتلك پجاما جديدة بالمناسبة دي و اعد بيها في بيتكوا.
#٢٠٢٠_عام _الپجاما
#٢٠٢١_طّلي_بالأبيض_طّلي
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الجمعة, مايو 3, 2024
آخر الاخبار
- سلة زعيم الثغر تواجه الزمالك في قبل نهائي كأس مصر يوم 30 إبريل الجارى
- مجلس الصيد يكرم فريق مواليد ٢٠٠٩ لكرة القدم
- مصيلحى ينظم رحلة للجماهير لاستاد البرج
- رحلة لجماهير الثغر.. لمشاهدة لقاء الاتحاد السكندري و الإسماعيلى بإستاد برج العرب
- سموحة جاهز لمواجهة بلدية المحلة الهداف احمد على امين يبحث عن فرصة للمشاركة
- اطلاق اسم السباح نبيل الشاذلي علي مجمع حمامات السباحة بالنادى الاوليمبى
- فيوتشر يتخطى فاركو بهدفين ويصعد للمركز الثامن
- فوز فريق الاتحاد السكندرى ٢٠٠٧ على الزمالك بالقاهرة ٢-١