يعيش الأنسان في الدنيا و بيكون صاحب رسالة ، بيعلم و يتعلم و بيكتسب خبرات و يكون علاقات و بين كل علاقاته بتكون في علاقة و شخص بيمثلوا له قيمة الدنيا في حد واحد و يصبح بالنسبة لهم نبض الحياة . في حياتي انا هذا الشخص هو ملك ، ملك روحي.
مين ملك ؟ ملك هي بنت اختي الصغيرة – بس احساسي بيها انها بنتي التي لم الدها و ليا فيها زي مامتها و بباها.
انا رسمياً ابقي خالتها و لكن هذه الصفة تظلم جداً ما احسه ناحيتها ، احساسي بيها فاق كل الروابط بتاعة الخالة والدة و بنتي الي مخلفتهاش ، هي كل دة و اكتر لأن ملك تمثل لي أمل حياتي او كما قالت الست : أمل حياتى يا حب غالى ما ينتهيش ، يا أحلى غنوه سمعها قلبي ولا تتنسيش.
حقيقة فعلاً ، ملك تمثل لي الأمل و الخير متمثل في شخص جميل بيدخل السرور و البهجة علي قلبي و بيحبني و بحبه بشكل يفوق مؤشرات الحب العادية ، اعتقد لو في مقياس زي الترمومتر ممكن يقيس درجة حبيّ لملك، المقياس هيتكسر من قوة الحب و شدته.
رسائل حابة اقولهالك يا ملك ( و لكل ملك في حياة كل حد فينا ) :
انت لك دور معنوي كبير في حياة اهلك ، بيشوفوا فيكي كل المجهود الي عملوه و انت نافذتهم علي المستقبل و فيكي أملهم لتحقيق كل الحاجات الي كان نفسهم يعملوها ، انت امتدادهم و انت استثمارهم الحقيقي ، خليكي دايماً عارفة قيمتك دي .
انت جميلة كما انت ، جمالك الحقيقي مش مربوط بشكلك و شعرك و ملامحك ، جمالك في قلبك و احساسك و معاملاتك ، جمالك الداخلي هو الحصان الرابح في منظومة الجمال الكوني ، جمالك الخارجي مكمل لجمال قلبك.
ربنا موجود و مفيش بينك و بينه وسيط ، الدنيا اعمق من انها صلاة و صوم و حج و زكاة ، الدين كل دول و فوقهم المعاملة ، و افهمي كويس ان المهم مش اليّ هتلبسيه علي راسك ، المهم ايه الي جوة راسك نفسها.
انت تملكي مستقبلك ، و مستقبلك يشكل حياتك القادمة ، لازم متكونيش عبد لأي حد غير ربنا، و علشان تتحرري من عبودية اي حد لازم تكوني مستقلة مادياً علشان الي بيصرف عليكي بيحكمك بقوانينه من غير ما يشعر ، مستقبلك هيخليكي مستقلة و الأستقلال هو اول طريق الحرية .
العلاقات في الدنيا مهمة ، هتحبي ناس و ناس هتحبك بس ابعدي عن الناس المجهدة اليّ بتبتز المشاعر و العواطف لأن دي بتبقي علاقات toxic و draining ، الناس دي لما تقابليها تاخدي ديلك في سنانك و تجري منهم بالمشوار.
متستعجليش انك تكبري ، متتصربعيش انك تنطي من مرحلة لمرحلة ، من مدرسة لجامعة لشغل لجواز ، احنا كبرنا اهو و عرفنا ان احلامنا اننا نكبر بسرعة كانت قصيرة النظر و نفسنا نرجع للمراحل الي نطيناها ، عيشي حياتك و اتبسطي.
تعاملي مع الحياة من منظور الحياة ، مش من منظور التيلفون الي في إيديك و التكنولوجيا لانها بتسرق وقت اولي تعيشي في سنك و تتعاملي مع ناس حقيقين مش تقضيها كتابة و تصوير علي مواقع التواصل الأجتماعي ، move from virtuality to reality و سيبي التيلفون شوية.
صاحبي الناس الصادقة الوفية المخلصة ، متركزيش انك تصاحبي الناس المختلفة فقط ، الصادقين مختلفين بصدقهم بس المختلفين مش دايماً ناس صادقة ، خليكي حريصة في اختيارك لأصحابك لأن اصحابك هم اخواتك الي بتختاريهم في الدنيا و يبقوا رفقائك في الرحلة ، فأحسني الاختيار.
الثقافة و التعليم شيئيين مختلفين ، انك تكوني متعلمة و شاطرة في المدرسة و الجامعة و تجيبي درجات ممتازة دة مش معناه انك مثقفة ، الثقافة سلوك اجتماعي وهي اشمل من التعليم لأن فيها جوانب من السلوك الأنساني و فيها تراث و ادب و عادات و تقاليد ، الثقافة بتفتح المخ في حين التعليم بجيب شهادات و ان كان ولابد من الشهادات فمتنسيش الثقافة لأنها هي الي هتصقل شخصيتك ، الثقافة بتعلمك حاجات حياتية مش في الكتب ، انت بالثقافة ممكن تتعلمي من العصافير و الشجر و الناس حاجات مش هتعرفيها مهما ذاكرتي.
وراء كل رجل عظيم إمراة او وراء كل إمراة عظيمة راجل ساندها و الأكلاشيهات دي سيبك منها ، لأن وراء كل انسان عظيم ثقة في النفس و تحدي و اصرار و فكر جيد بغض النظر عن كونه راجل او ست ، خلي هدفك واضح و عظمتك من ذاتك .
بوصيكي علي امك و ابوكي توصية كبيرة ، انت قطعة منهم و بوصيكي علي خالتك و النبي . لما اكبر خدي بالك منيّ خصوصاً لو عجزت و عييت ، انت بنتي الي اتمنتها من كل قلبي .
الي ملك روحي و الي كل من هم جزء من ارواحنا و ابناءنا الي مولدناهومش – انتم نبض قلوبنا و ضي عنينا و شمس الدفء الي بنعيش فيه ، دمتم لنا و في قلوبنا انتم متربعين.
كل سنة و انت طيبة يا ملك روحي يا احلي #Sweet_Sixteen
#الخالة_والدة #ملك_روحي
اشترك في نشرتنا الإلكترونية مجاناً
اشترك في نشرتنا الإلكترونية مجاناً.
الأحد, أبريل 28, 2024
آخر الاخبار
- سلة زعيم الثغر تواجه الزمالك في قبل نهائي كأس مصر يوم 30 إبريل الجارى
- مجلس الصيد يكرم فريق مواليد ٢٠٠٩ لكرة القدم
- مصيلحى ينظم رحلة للجماهير لاستاد البرج
- رحلة لجماهير الثغر.. لمشاهدة لقاء الاتحاد السكندري و الإسماعيلى بإستاد برج العرب
- سموحة جاهز لمواجهة بلدية المحلة الهداف احمد على امين يبحث عن فرصة للمشاركة
- اطلاق اسم السباح نبيل الشاذلي علي مجمع حمامات السباحة بالنادى الاوليمبى
- فيوتشر يتخطى فاركو بهدفين ويصعد للمركز الثامن
- فوز فريق الاتحاد السكندرى ٢٠٠٧ على الزمالك بالقاهرة ٢-١