مكانش بيحبك…
كان غاوي بس السرمحة داخل عيونك لما تلمع لما بتبص لعيونه وقلبه يرقص من طبول قلبك ودقاته السريعة تضخ دم ياخدها جري من العروق يطلع على خدودك يورّد وردتين على كل خد.
كان حد عادي
انسان روتيني
من بيته للشغل لصحابه لبيته للشغل لصحابه لبيته للشغل لصحا….
مالهوش صحاب!
كانوا باب .. يخبط يفتحوله يلاقي فالاخر سراب
النقطة دي ممكن نسيبها
بلاش نفتّح فالجروح؟
مابقاش يأثر مين يكمل جنب منه ومين يروح
كات روحه بالنسبة لكتير
حتة قماشه لدمع واحدة بتشكي حالها ويشرب الدمع اللي مخلوط بالوجع
تشرب في دم اتنين صحاب اتخانقوا مرة وكان بيصلح في اللي متكسر
عشان…
من غير عشان
ماهواش جدع علشان نقول …
لو كان جدع … كان حب من اول لقا
كان قال كلام رن في ودانك سيمفونية بتهوفن “ضوء القمر”
ورقصتوا مع بعض في خيال
لو كان جدع … كان قال انا نفسي احضنك
واحس صدري بنتفض من بين ضلوعي
كان قال هاموت لو تبعدي
وخدودي هاتبوش من دموعي
كان حط ايدك بين ايديه متعشقين ويقول لكل الناس حبيبتي ويفتخر انك معاه في خطواته ماشيين تاتا تاتا
والناس تقول الله على الحب اللي بينكوا “بنية صافية”
الناس بلاط
م الصعب نعرف اية مخبية النوايا .. تحت البلاطة
مكانش بيحبك عشان …
حبك بجد
وخاف عليكي تقصقصي ريشك عشانه ويربطك جنبه في حجارة “طور في ساقية”
كان صعب جدا ..
يربط فراشة بخيط امل يمنعها يوم تقدر تطير وعايزها تفضل جنبه باقية
مكانش بيحبك ..
كان غاوي بس السرمحة داخل عيونك كل مرة تعدي فيها وروحه تتحول صنم ممنوع يقول كل اللي فات من تخطيطات داخل خيالك مع زيادة حبكة ليكي في ليل شتا لو تبردي يطلع شجاع ويدفي روحك في الجاكيتة
مكانش بيحبك عشان …
حبك بجد
لكن ..
لو قال بحبك وافترقتوا
كنتي ايوة هاتمشي لكن ..
ناقصة حتة
#مكانش_بيحبك
#مصطفى_يوسف