وأنت خارج من مصر وبتمر على الجوازات، وأول ما بتاخد ختم الخروج بتحس بغربتك …. غربتك عن أهلك، وناسك وحبايبك، وأصدقائك ..
بتحس إنك غريب لامنك بقيت فى بلدك، ولا منك ضمنت غربتك .
بتسافر وعندك أمل إنك تكون حياة جديدة فى بلد جديدة ،وبصرف النظر عن البلد المستقبلة لك ..انت بتكون عندك أمل فى اي مكان حتروحه وبيكون عندك قناعة فى حياة أفضل .!!
لكن الواقع إن مش كل السفريات والعمل بالخارج هو الحل الناجح والمخرج لك .. و زى مافى سفريات بتنجح كتير فى سفريات ومن أول سنة بتفشل .. وبيرجعوا لبلدهم.
ومش كل مكان حتحس فيه بالراحة والأمان….
سافرت لبلدان عديدة ..بلاد تحس فيها بإنك فى بلدك وبتحترم الاخر فى كل شىء
وبلاد تحس فيها بالغربة القاسية..
بلاد فيها الأمان وبلاد لم أشعر فيها بلحظة امان.
وأصعب شىء طعم الفرح والحزن وأنت خارج بلدك
فى الفرح ..تحب تفرح مافيش حد حواليك
وحتى الحزن .. ماتعرفش تشاركه لأنك بعيد عن أهلك .
لا منك فرحت ولا حزنت .. بتكون عايش ومش عايش .
وحتى محاولة تكوين صداقات جديدة ،فأغلب صداقات الغربة غير دايمة ..لعدم استقرارهم فى الاغلب .
أما ميزة السفر ..وأنت بالخارج بتشوف الناس صح .. بتشوف اللي بيقربلك لمصلحته وبتشوف إللى بيقربلك لشخصك.
بتقدر تحدد اللى واقف معاك واللى واقف ضدك .
بيكون عندك رؤية واضحة للامور والاشياء..
ده سببه ان احساسك بوحدتك بتخلق عندك قوة احساس بالآخرين .
السفر له فوائد ومنافع بس مش حتكون مماثلة لاحساسك وانت وسط أهلك وناسك
(وحتفضل غريب فى بلاد غريبة .)
#شيريناز_الفاطينى