……
مش كل اللي عشناه ينفع يتكتب
ولا كل اللي بيتكتب عشناه
لو وزعت وجعي عليكوا اكيد هتموتوا
احترموا الموجوع ف سكوتُه
واحترموا النص دا حتي لو فقد معناة
فهو اتكتب رغم المعاناه
…..
البُعد والخذلان وجراح حبيب سابها
عن ضربة من فلان معملتش يوم حسابها
فدخلت دنيا الجد قفلت عليك بابها
وبقيت عجوز كهل وانت ف العشرينات
سألت نفسي كتير هل مثلا اللي فات
كان درس بيعلم ام اني هتألم
اكتر من الجايات ؟
…….
هل هبقي يوم حي بضحك وسعيد بيهم
ام اني هفضل ماشي وروحي ف ايديهم
وازاي اموت بينهم بعد اما موت فيهم
……
وازاي وليه اصلاً بخسر ف كل رهان
احساسي بالامان مع حد معرفهوش
يربطني بيه موقف وانساه بمرور اليوم
او قاعدة مع نفسي كل قبل النوم
وسريري معرض ذكريات ملايات ماليها الحزن
……
بضحك علي السُذج ساعة اشتياق الحضن
تسمعني ناس ف عروقي كات نايمة
فاضحك واقول احضانكوا مش دايمة
اعتادت حضن الوحدة والضلمة بنام وانا مرتاح
واهي حاجة باقيالي.
…..
بسأل علي عيالي مين ممكن تبقي امهم
هل هي مثلاً دلوقتي بتسأل علي عيالها
ف مكالمة تليفون مع حد غريب تاني
بيفكروا ف اساميهم وبيضحكوا بيهم
وبيحلموا ليهم وانا هاجي ف قاعدة صالون
انهيها وانهيهم..!؟
ام هي بنت قاعدة ومقضياها عياط
مضروبة في الخلاط كما ضربي بالتوقيت.
هل هبقي انسان عابر مالهوش عيال وبيت
ومقضيها ف بلاد وبقول كدا احسن.
…..
والله انا بحزن كل اما اشوف الجي
معرفش ليه قبل اما انام لازم اتخيل حاجات
مش ببكي علي شيء فات
اد ماانا خايف بكره مخبي ايه.
…..
وازاي احلم بحد من غير ماافكر فيه
وازاي عنيها تسألني كل يوم مالك
واحكيلها اقوم مرتاح
هل كانت الارواح يومها ف لقاء فعلاً
ودي حاجة الاهيه
ام هي مثلا حلمت كمان بيا
او كل دا كان وهم فاقد التفسير
فحلمت بيها كتير
نتيجة التفكير من بعد اول حلم.
…..
حد شافها بعيني مثلاً
حد شاف حد ف منامُه
مرة عاتبُه ومرة لامُه
ومرة سابُه دون سبب
قصة كاملة تنتهي بكابوس طوفان
وهي لما حكيتلها عن حلم زارني سبع ليالي مفسرتش
ان الطوفان كان بُعدها
وبقيت بنام ولا زارني حلم من بعدها
…..
ادي النهاية حتي الخيال مسلمش من وجع النهايات
ولاول مرة مخافش من الجاي اد زعلي علي حلم مات
وبقيت اعذرها وازعل منها اوقات
واحكيلها حاجات مش عارفاها
اشكيلها كل اللي تاعبني
وانام احلم
وحاسس انها هتسيبني
وانام احلم
النوم بسهولة بيغلبني
عشان احلم واقوم موهوم
بقيت عايش ف واقع مؤلم
وحلم جميل اخره حزين
الوقت يعوض بني ادمين
لكن هتقابل حد امين
وهتخسره جهلا او فوبيا
انه يكون زي التانين
ودا يصعب جدا تعويضُه
احيانا والله بدمع
علي واحد ضيع من ايدُه
ايام علي حلم بيتكرر
وبناه قبل مايحط اساس
ملعون احساس
كان جاي بنية يإذينا
ويموت الفاضل فينا
الناس بتيجي تعزينا
وبتمشي وبتنسي واجبها
بطلت اسأل وبنام وخلاص
وبعتاب ناس تانين غيرها
لكن بمجرد عيني ماتنام
لازم تسألني علي عينها
والحلم يتكرر تاني
مبقتش بعد الكام اصلاً
لكن بسأل.
حد شافها بعيني مثلاً
#تزوير_ف_احلام_وهمية
الجمعة, مايو 3, 2024
آخر الاخبار
- الاتحاد السكندري يهزم الأهلي ويتوج بطلا لكأس مصر لكرة السلة
- سلة زعيم الثغر تواجه الزمالك في قبل نهائي كأس مصر يوم 30 إبريل الجارى
- مجلس الصيد يكرم فريق مواليد ٢٠٠٩ لكرة القدم
- مصيلحى ينظم رحلة للجماهير لاستاد البرج
- رحلة لجماهير الثغر.. لمشاهدة لقاء الاتحاد السكندري و الإسماعيلى بإستاد برج العرب
- سموحة جاهز لمواجهة بلدية المحلة الهداف احمد على امين يبحث عن فرصة للمشاركة
- اطلاق اسم السباح نبيل الشاذلي علي مجمع حمامات السباحة بالنادى الاوليمبى
- فيوتشر يتخطى فاركو بهدفين ويصعد للمركز الثامن