بتحبها!!
بتلاقي روحي فـ ضيها
بتكْتبلها اشعار! وتحكيلها ليل ونهار!
كلمتها عني ؟!
قولتلها إني ملاك وإني فضلت معاك لنهاية القصة
قولتلها حبتني!
قولتلها كتـ بنتي
ولكني ماقدرتش ابقالها اب بجد!
قولتلها ايه عني ياوجعي فـ الماضي
وياذكرى قتلاني اكتر من اي وقت
موجودة فـ كتابك ولا اتبنالي سد!
ماعرفش إيه ذنبي إللي ارتكبته زمان ؟!
يمكن عشقتك عشق زي اللي فـ الافلام
وانت إللي كان اَخرك إعجاب على الماشي
سلمت ليه إذا كُنت مش اد تعشق حد!
ولا اد تبقى لآخر السِكة
سلمتلك جدا وطلعت م الحَبكة
خسران بدون داعي
بـبكي وبدراعي بـَحضُني فـ الاخر
الوضع مش ساخر ولا حمل اي هزار
ساعة الوجع حافظ ع الباقي فـ كرامتك
وبلاش تكون عادي، وتعدي فـ إهانتك
انت إللي حبيتهم
من اول القصة ولحد ما اتقفلت
او لسه مفتوحة
“ارواحنا مدبوحة من حد مش لينا ”
شَبّكنا ليه إيدينا إن كنا هنسيبها!
البنت فرحانه وطايرة بــ حبيبها
ماهو كان زمان ليا
وانا كنت فـ مكانها
يكتبني اغنية واسهرله ألحنها
يتعب ؛فـ احس بألم
يفرح ؛يطير قلبي لحد عنوانه
لو كنت فـ مكانه هل كان هيشتاقلي!
او تكوي قلبه الغِيرة ويجيني يلحقني..!
ماعرفش صدقني ايه اللي زاد ناري
فكرة تحب جديد ،او تَعشقك غيري؟
طول عمره كان طيري مهما يغيب عني
ده انا لسه بكتبلك فـ كل يوم ذكرى او كلمة او نظرة فـ لُقانا عشناها
كملت ليه معاها وانا قلبي قيد أسرك!
قطعت فـ دفاترك ورمتني براها ودخلتها هي …
وبـ كل شوق ليا تقولي مُشتاقلك!
عذرا ياسبب الشرخ جوا صميم روحي
مابقتش ناقص جرح يزودلي فـ جروحي
ولا حمل موجة فرح لحظة، واعود تاني للكَرة م الاول
مبقتش بَتْكَمِل بوجودك الزايف
حبيت تكون فايز فـ نهاية المشوار
مبروك بقيت مغوار وبـ رُتبة اعلى كمان
“كُتر الوجع فـ العزف يقتل فـ اي كمان ”
وانا وتري اضعف من كمان صيني
عشمان تلاقيني واقفه وبستنى ترجعلي من تاني
فرحان وانا بعاني …
صدقني مش فارقه مهما الجروح زادت فـ الجسم لو ميت
ماهو فـ الاساس فاقد للحِس والقوة
ماقدرش اقول ” هو ” إللي عشقته زمان
ولا حتى ينفع “كان ” تتحط فـ الاول
سابني ماليش مأوي ووحيدة من بَعده
سابلي زمان قصة وياريتها تتحول
وانا لسه على حالي…
بَمشي فـ شوارع شوق
واكتب على الارصفه
قلب ألتقيته ؛فـ غاب
والدنيا مش مُنصفة…
كان في رصيف شاهد ع الضحكة من قلبي
كان في حبيب واخد جوايا ١٠٠ مَطرح
ساب وردي ليه يطرح وماحلتهوش ماية!
وانا اللي قالي زمان عاشقك ورايد اكون
كما نُصك التاني
صدقته وكأنه رتل على روحي تعويذة من حُبه
وانا قلبي كان عاصي وفاقد المرسىٰ
سلمت ولـ قلبه فتحت احضاني
سابني بعيش قِصة ناقصة طرف تاني …
#بتحبها
#حنان_جمال