العطاء صفه او اوبشن مش بينزل لكل البني ادمين.
او بيبقي عند الناس بنسب متفاوته جدا زيه زي صفات كتير.
الناس المعطاءه بسخاء مش كتير في الدنيا .. وللاسف في ظل سرعه الحياه وماديتها، الناس دي بقت تحس انها مظلومه او مستغله (بفتح الغين).
لان الانسان بطبعه طماع .. يعني لما اللي قدامك يلاقيك بتدي طول الوقت هيتعلم ياخد طول الوقت (حتي لو مش محتاج او حتي لو هو اصلا مش كده) بس علي رأي المثل (اللي يلاقي دلع وميدلعش).
فانت بقي كشخص معطاء تعمل ايه؟
تدي بس وانت واعي بتدي ايه ولمين وامتي…
ولما تلاقي الامور هتفرط من ايديك تفرمل نفسك وتستني تشوف الطرف التاني هيعمل ايه.
والله طلع عنده اصل ورد العطاء بعطاء .. تمام .. نرجع نكمل عادي وندوس بنزين.
انما بقي طلع معندوش دم .. يبقي تفضل مفرمل .. وتشد فرامل اليد كمان .. وتدورلك علي حته ضل تركن فيها حبه حلوين كده .. لحد ما الشخص ده ينزل من عربيه حياتك .. ويتكل علي الله .. ويختفي تماما .. وساعتها تبتدي تشوف حد تاني يكمل معاك المشوار للاخر.
وفي كل الحالات متخسرش حد ابدا .. دي قاعده عامه في الحياه.
لانك في يوم من الايام هتتفاجئ ان كل اللي الخير والحب اللي زرعته، بيرجعلك تاني سواء في نسخه معدله من الشخص الاناني .. او في اشخاص تانين عمرك ما ذرعت فيهم حاجه.
الدنيا دواره .. والخير والشر بياخدوا لفه في الحياه ويرجعوا لصاحبهم تاني اضعاف مضاعفه.
الخلاصه .. اوعي تخلي تجربه سيئه تخليك تبطل تزرع خير وبهجه وامل في كل اللي حواليك .. لانه هيتردلك في يوم من الايام.
#صباحكم_سعاده
#باسنت_عثمان