عـارف كويـس إن حُكَّام البِـلاد هُمَّا البشر..
هُـمَّا اللـي فارضـين القواعد للسـلام..
وفنفس ذات “الأمن” زارعين الحروب.
وان الهِلال لُه دورة ثابتة ويكتمِل وِش القمر..
وان لحظة غاب دا بيبقى تأثير الغمام..
وان النـجوم بِـتهِل من بَـعد الغـروب.
وان اللـي طول العُـمر بِـتقولُه الحياة..
ملهوش علاقة باللي بيقولُه الكتاب.
وان اجتناب “الفُجر”فيه طوق النجاة..
وان اعـتناق الذنب بيسوق للـعذاب.
وان المطر مِ المُستحيل ينزل ف يوم من غير سبب!
أقصـد بإنُّه مِن الطبيعي بيبقـى من بـطن السُحُب!
وان القـواقع و المـحار!
مبنلقهاش غير ف البحار
وان الريـاح بتجيب غُبار
وان القمر مش ف النهار!
لكن متعرفش ان فيه أشياء منعرفهاش قوي!
تِعرف بإن الليل بيتحوِّل لشاعر ف الشتا؟
وان الشجر لو صابُه شيء اسمُه الرياح
والهمهمة تهمسلُه يُرقص فِ البراح
هيقول كلام أخطر كتير من أي شاعر؟
وان الشواطئ لمّا تُحضن رَمْلَها..
والجَزْر يِتْهجِّم ويسرق حُضنها..
تِلقاها سابت ع الرمال أبيات شجن؟
أصعب رثاء ما تلاقي زيُّه عند شاعر!
إنزل على البحر وْ جاريه.