الشعر مش ابيات نسردها تعجبكم
الشعر فيه اوجاع متصاحبة بوجعكم
كام شخص سابنا وباع روحنا فـ مزاد علني
كسروا سنون قلمي وطلبوا اني احاسبهم
الحلو طيف ساكن اوجاعة بالوحدة
بيواسي ضعف الناس ويصاحب الطرقات
بيحب كل جميل وبيكرة المسافات
كتر العياط مفرقش الفرح مـ المحنة
فاشل في كلمة انا وديماً يقول احنا
المغربيه ساعات تجبرنا علي اشياء
وبدون كلام تشتاق انك تحنلها
فالمشي عـ الكورنيش وقهاوي وسط البلد
فتشوفك انت هناك ماسك في ايد غيرها
تعاكسها نسمة هوا فخصلة ضفايرها
تضحك ببان قلبك ترسمها في عيونها
وتراقب انت بعيد المشهد الخارجي
من بين جفون قلبك وجسمك الشفاف
كانت الاشاره هناك بتقولك اتحرك
وانت شايفها نزيف والاعمي عمره ما شاف
كدب انين الروح واسمع كلام الجمع
ان انت لسه سليم وكل دا كان شمع
محطوط ما بين عضمك علشان ميتأثرش
ومفيش ما بينا ضمان وواجب عليك السمع
ويسلموا اللعبة لشخص همجي جديد
استنزف اللعبة وقطع العلاقات
فازاي يطول الفرع والجدر كان فيه مات
فالاصل يا حضرات الكل زمبليكات
عيشوا فبقايا الروح واستنزفوا الفرقة
هاجروا الفراق بوداع أو ضحكة بالصدفة
او بسمة من طفلة معدتش ٦ سنين
او دعوة جت ف القلب من امي علي غفلة
ارزقنا يا الله بصحبة قلوب صافية
ارزقنا ضل صديق يكون بديل الضهر
واوهبنا حضن يساع لدموعنا ميملش
يمسح عيون الناس من جوه اقدارنا
واكفينا شر حبيب نحتاجله ميحنش
الفجر كان قرب يسلخ في روحنا نهار
وخناقه جوايا لمواقف الذكري
ورموشها واخدة مخالفة اشغال طريق القلب
الأمر دا كان صعب
كان صعب اصدقها واكدبني كالعادة
في زحمه جوايا وحالة انفصام نسبي
عملت ورقة حظ لجل اني مترددش
فلقتني بختارها وهي بتسبني
ولقتني زي جنين فاقد حنان امه
تاية ما بين الخلق رغم انه كان وحده
الحلوة اهي بعده قدرت خلاص تنساه
بعدت ولسه معاه البطلة في روايته
بداء الانونجي
يعزف إيقاع غامض ، خارج عن النوته
شذ الايقاع وقتها ولكنة كان مختلف
الفرقة معترضة بنظارتها الحادة
” بتقول دا شغل جنان ”
في الجانب الآخر سقفلة الجمهور وبفضلة كان معترف
فيه بعض الروايات لا تعجب النقاد
رغم أنها ناجحة وبتعجب الجمهور
بالمختصر يعني امشي بقراراتك
او كلمة بين تنصيص ” اصنع لنفسك دور ”
الشجرة بتضلل مع انها في النور
في وقت لازم فيه تتجاهل الاضائات
مش كل شكل جميل تفتح في قلبك ليه
في وقت جايز فيه بتخنا شكل حاجات
مش كل شئ يتحب ولا كل شئ يتساب
في حاجات بدون اسباب
تلقاها ماسكة اديك ، دور كويس فيك
هتلاقي بعض حاجات بتقولك اتحرك
او مج شاي بحليب واجة معاك اليوم
او قطة جت جنبك بدون سبب داعي
لحظه ما زار قلبك صاحبك في وقت النوم
بتخنا الاحلام بين ( الامل و الألم )
او وقت مش عاوزين فيه اننا نفهم
وتسبنا وقت الجد متحالفه مع غيرنا
زي اما بتسبني كل اما باجي احلم
فاكراني بنساها يعني بمرور الوقت
والله مش بالوقت ..
دا انا لسه وحياتك بشرب في ماية كتير
بطلت ابص شمال أو حتي ابص يمين
حافظ كلامك صم وكل افعالك
والله وحياتك
وحشني الخروج بالليل
والضحك والسيما وكمان ركوب الخيل
ما العن التفاصيل
فاكراني بنساها يعني بمرور الوقت
والله مش بالوقت ..
انا لسه بردوا بميل ..