بقيت عايش مريض نفسى
بيتخيل حاجات دايما ومبتحصلش
وبعزم ناس مبعرفهاش
على القهوة
وانا قاعد فى بلكونتى
مفيش غيرى
خطوط سيرى
يوماتى تعاند الخطوة
وبلقانى
بتوه
وانا لسه ف مكانى
مابتحركش
بكلم كل يوم الحيطة متردش
منيش عارف
مخصمانى
يا اما تكون مهيش سامعة
ودمعة
تجر ميت دمعة
وحال بيطول
ومبيخلصش
لقيت عمرى بينزف
كل يوم صاحب
وينزف كل ليلة
بنت بتسيبنى
وينزف كل طلعة شمس فى ملامح
بدور ع اللى جاى بكرة
اشوفة سبقنى لامبارح
ويتطبق ف درج سنين
مالوش مفتاح
بقيت سواح
يطوف فى الناس يعمرهم
وهما يكسروه بشويش