سلمي الطفلة ذات الثمانى سنوات التختوخة البكابوظة زي ما اهل منطقتها كانوا بينادوها و هي رايحة المدرسة، من اسرة بسيطة جدا اربع اطفال. سلمي ترتيبها بين اخواتها الثانية الام تعمل جليسة مسنين و الاب عامل محارة يسكنون في شقة ايجار جديد غرفتين و صالة في احد المناطق الشعبية بالاسكندرية باباها حاول يحسن من وضعه المادي فأجر محل صغيرو فتحه بقالة بسيطة و كانت سلمي بتساعده. بتحول صناديق الكاكولا لوحدها من البيت اللي في ضهر المحل لحد المحل و كان اهل المنطقة بيستعجبوا و يعاكسوها و هي شايلة الصناديق و هي في السن دا كان عم محمد سعيد صاحب باباها في الرايحة و الجاية يعاكسها و تقوله بقي بلدغتها بث بقي يا عم ثعيد بث لابنك ما هو طخين زيي اهو و بعد حوالي شهر من ايجار المحل و نزولها المحل مع باباها بالظبط يوم الخميس 21-7-2016 .
ا قامت من النوم نزلت من السرير مكملتش سلمي تلات خطوات و وقعت علي الارض في البداية مامتها فكرت انها دايخة و بعد ثلاث ساعات اخدتها و جريت علي الطلبة و عملوا تحليل دم ليها و قالوا ان البنت معندهاش حاجة و ابقي تعالي السبت العيادة الخارجية اخد الام و الاب البنت و روحوا بيها و هما مش فاهمين ايه اللي بيحصل لسلمي.
حاولوا يقعدوها مقدرتش!! دخلوها الحمام وقعت علي ركبها مقدرتش تقف !! دخلوها تنام مقدرتش حتي تتقلب يوم الجمعة الصبح مامتها و باباها راحوا بيها مستشفي ونجت للاطفال.
هناك قالوا لها اجري بيها علي الشاطبي احنا منعرفش عندها ايه؟!! في استقبال الشاطبي في البداية الدكاترة قالوا مفهاش حاجة لحد ما وقعت البنت ادامهم فحولوها الميري تعمل اشعه مقطعية علي المخ.
دكاترة الميري قالوا ان الاشعات مفيهاش حاجة و بالتالي احنا محتاجين رنين علي المخ يمكن يوضح الصورة افضل و حولوها علي مستشفي السراية هناك الام مكنش معاها غير 400 جنيه قصاد اشعات بحوالي 2000 جنيه، يومها الدكتور عمل الاشعات من غير مقابل للاشعة و اداهم الافلام عشان يرجعوا بيها الشاطبي تاني في الشاطبي دكتور اسمه محمد مصطفي مال علي الام و اداها 1000 جنيه في ايدها و بلغها ان الاشعة سليمة لحد دلواتي، و محتاجين نعمل رسم عصب و فعلا الدكاترة حجزوا ليها في مركز د ابراهيم خليل و فعلا راحت سلمي تاني يوم لدكتور ابراهيم و اول ما عمل رسم العصب قال للام فورا علي المستشفي تدخل العناية خلال ساعتين لان الرئة بتقف لان البنت عندها مرض بييجي لحالتين كل 100 الف حالة و هو متلازمة الجيليان باريه المعروف بالشلل الرخو الحاد و دا مرض بيهاجم الاعصاب لكل اطراف الجسم و بعدها بيهاجم اعصاب المخ و الرقبة و الرئه و هكذا جروا بيها علي الشاطبي بلغوهم في الشاطبي انهم يدوروا علي عناية و طبعا يبدأ الكعب الداير، وكل المستشفيات الي شافوا التقرير يرفضوا البنت .. الطلبة رفضت و الملكة نازلة شرحها و الجمهورية و المركز الطبي و غيرها و غيرها ….. كل دا و البنت في عنبر الشاطبي في الدور الرابع و لازم تدخل عناية مركزة و فجأة البنت بدأت تزرق و بدأت تنزل ريالة من بقها ..!!!
فجه دكتور و طلب من مامة سلمي تنزل تجيب تذكرة عناية من غير ما تقول لحد انها هتتحجز في عناية الشاطبي نزلت مامة سلمي فعلا و قطعت التذكرة عشان تدخل العناية و بعد دخولها العناية اتفاجأت الام ان سلمي محتاجة كورس علاج كل خمس ايام 32 الف جنيه حقن لمدة 48 يوم و عملوا ليها شق حنجري في البداية الدكاترة جمعوا 13600 جنيه و بداوا نصف جرعة لحد ما يحاولوا يشوفوا حد يشيل حالة سلمي لانها هتعدي 300 الف علاج.
في التوقيت دا حد من دكاترة المستشفي كلم جمعية انقاذ حياة طفل و بلغوا المستشفي ان الجمعية هتجمع للبنت و هتتحمل العلاج و بفضل الله بدات سلمي تحرك رقبتها بعد فترة و بعدها صوابع ايديها و بعد فترة بدات صوابع رجليها وقتها الدكاترة بلغوا الام ان سلمي هتحتاج سنة علاج طبيعي عشان تقدر تمشي علي رجليها و بعد حوالي شهرين طلعت سلمي من العناية، والان فى مرحلة العلاج الطبيعى بعد ان تماثلت للشفاء بنسبة فاقت 95 % … وتواصل جمعية انقاذ حياة طفل دعمها لحالتها .. ولغيرها من الحالات المستحقة للدعم
كتبت : ايمان سلام
لدينا حالات كثيرة مثل سلمى : نحتاج لدعمك ولجهدك
309 تقسيم الضرائب خلف جاد سموحة
الإسكندرية
01272222468
01272222463