بعد أن داخت أم حودة دوخت البلجيكى داخل إدارة أحد الأحياء هى وانشراح اشكرى ومعها أم عطيه لاستخراج رخصة كشك سجاير لأم عطيه من 9 صباحا حتى 3 بعد الظهر وفشلت فى استيعاب ما يحدث بين الشبابيك:
موظفة1: روحى يا حاجة غيرى الصورة دى لأن دبوس الطرحة فى الصورة معووج ناحية اليمين .. اتصورى صورة بدبوس فى النص!.
أم حودة: اشمعنى فى النص يعنى هو على جنب يبقى حرام؟ ..وبعدين دى صورة أم عطيه وهى ما عندهاش غير دبوسين بس .. دبوس راح يوم المرحوم ما مات وهى بتصوت عليه اتنطر فى العزاء ودوخنا عليه مالقنهوش .. شكله زعل ع المرحوم ..والدبوس المعووج ده كانت جيباهولها حماتها بعد م انتهت شهور العدة .. منها لله حماتها طول عمرها مدوخاها ومعطله المراكب السايره .. ماشى يا أستاذة هسلفها دبوس طرحتى تتصور به وترجعه تانى ..!.
موظفه2: م أنا قلت مليون مرة محدش يقدملى طلب إلا لما يكون ممضى من الشباك اللى فى الدور الأرضى عند الأستاذ/ بولس.
أم حودة: “تسأل مواطن واقف قدام شباك الأستاذ بولس فى الدور الأرضى) ده يا أخويا مكتب الأستاذ بولس.
المواطن: أيوه يا حاجة هو بعينه
أم حودة: أمال فين هو مش قاعد على مكتبه؟
مواطن ملتحى: (يقف على يمين الشباك) بيصلى الظهر يا حاجة!!
انشراح: اشخرله ياخالتى؟
أم حودة: اخرسى يا بنت .. سيبهولى .. مين يا خويا اللى بيصلى الظهر؟
مواطن ملتحى: الأستاذ بولس!!!
أم حودة: أنت بتشتغل أيه ياشيخو
مواطن ملتحى: أنا شغال هنا فى إدارة الحى .. استعلامات!
أم حودة: ماشى يا بنى هستناه
مواطن ملتحى: ممكن يغيب يا حاجة .. لو عايزة تنجزى قوليلى اخلصلك الموضوع.
أم حودة: عايزة اعمل رخصة كشك سجاير لأم عطيه والورق اهو روح هاتلى توقيع الأستاذ بولس لو عارف هو بيصلى فين؟
مواطن ملتحى: (يفر فى الورق وينظر لأم حودة باستغراب) فين يا حاجة الحاجة اللى هتمشى الورق ده؟
أم حودة: (فهمت قصده وبتستهبل عليه) حاجة ايه يابنى؟
مواطن ملتحى: ههههههههههههههههه طيب تعالى على جنب هنا وأنا أقولك (يهمس فى ودنها) 3 بواكى ..وبكرة تيجى تلاقى الرخصة جاهزة!.
أم حودة: ويكون الأستاذ بولس خلص الصلاة ولا لسه يابن الدايخه .. ناولينى الشبشب يا بنت يا اانشراح ..وتنزل عليه بالشبشب ..وانشراح ترقع بالصوت!
يتجمع المواطنين ويخلصوا الشيخ من أيد أم حودة ويظهر الأستاذ بولس ويشخط فى أم حودة خلاص يا حاجة هاتى الورق بتاعك.
أم حودة: أنتى مين أنت راخر؟
بولس: أنا الأستاذ بولس هخلصلك الورق بس أهدى شوية
أم حودة: حرما يا بولس!! صليت كام ركعة ياروح أمك؟؟؟ .. ثم تتجه لانشراح يالا يابنت .. روحى بسرعه اندهيلى يونس الحلاق خليه يجينى ع البيت
انشراح: حاضر يا خالتى فريره
أم حودة: خليه يجيب العدة معاه ..وأنتى جاية هاتيلى مشط فلاية كبير من السوق وازازة جاز معاكى .. يلا يا أم عطية ..الموضوع كبير وأنا هتصرف بطريقتى.