الحياه فرص…
ربنا بيبعتلك فرصه ورا فرصه…
مره فرصه علي شكل حلم كنت مستنيه من زمان…
ومره فرصه علي شكل فكره تخطر علي بالك في ساعه تجلي…
ومره فرصه علي شكل انسان ربنا يحطه في طريقك…
في ناس ربنا خلقها بالفطره كده قادره علي استغلال الفرصه .. ودول بتبقي حياتهم ماشيه لوحدها كده اتوماتيك (زي السكينه في الحلاوه) .. سهله وبسيطه وغير معقده .. والنوع ده مش كتير.
وفيه نوع تاني بيتعلم ويدرب ازاي يستغل الفرصه ويحولها لمصلحته ويقدر يستفيد منها وهو وشطارته بقي يا صابت يا خابت .. (دول الغالبيه العظمي من البشر).
وفيه نوع تالت انا بسميهم المبدعين او الملهمين دول بقي اللي بيخلقوا الفرصه بيصنعوها علي ايديهم وبمنتهي الاراده والمثابره .. ودايما تلاقيهم عندهم رؤيه، خطه وخطه بديله .. احتماليه الغلط بالنسبالهم لا تتعدي ال1 %
الناس دي على قد ما حياتهم بتكون مرهقه علي قد ما بتكون ممتعه ومليانه شغف.
لو قابلت حد من النوع ده امسك فيه بايدك واسنانك متسبهوش .. اتعلم منه .. استفيد على قد ما تقدر عشان دول في حد ذاتهم فرصه.
في كل الاحوال وسواء كنت من النوع الاول او التاني اوعي تضيع الفرصه .. عشان اوقات كتير الفرصه لو راحت مش بتيجي تاني والندم بعدها بيكون صعب اووي
عيش حياتك بوعي.
عيش وانت عينك مفتوحه عالفرصه .. وروحك مستعده لاستقبال رسايل ربنا في اي وقت واي مكان وعلي اي شكل.
#صباحكم_سعاده
#باسنت_عثمان