بقالى فترة مش صغيرة عايش الحالة دى بافكر فيها بادور على كل معالمها باحاول اوصل لإجابة على السؤال دا ازاااااااااااااااى تعيش سعيد — اساساً ربنا خلقنا وخلق لينا جوانا وحوالينا حاجات كتير كلها علشانا احنا ولينا احنا مفيهاش حاجة خاصة بملكوته ووحدانيته الا عبادته حق العبادة والايمان به وبرسله وبوحدانيته وقدرته وقدراته غير كده وفر لينا جوانا وحوالينا كل اسباب السعادة —- لما كنت باتكلم مع اللى حواليا واللى باثق فيهم بنسبة ما كنت باسمع منهم ان السعادة قرار فردى احنا اللى بناخده لنفسينا سواء بمؤثرات خارجية او وسائل مساعدة او مجرد احساس بنحس بيه بنجبر نفسينا عليه — كنت باضحك من الكلام دا اوى كنت كمان باشفق على اللى بيقولهولى كتير لان كلامه معناه ان المفروض يعنى يبقى مفيش حد تعيس وحزين فى الدنيا — حتى لو كان مجنون او مسجون او ممحون او تملئه الحيرة والظنون —كنت باضحك وباشفق عليهم لانى مع الايام اكتشفت ان السعادة احساس مشترك بينك وبين كل اللى حواليك لازم لازم لازم — انسان او حيوان او جماد او اى مؤثر اخر —- السعادة مش مجرد انك تضحك وبس لا كمان لازم ان غيرك يضحك السعادة مش انك تفرح وبس لا لازم غيرك يفرح السعادة حالة لازم تشترك فيها مع كل اللى حواليك — والأكيد الأكيد الأكيد انهم لازم يشاركوك الاحساس دا ويمنحوك منه كفايتك علشان انت كمان تحس بيه — السعادة عاملة زى قطر رايح جاى على قضبان مختلفة وطرق مختلفة ومحطات مختلفة وناس مختلفة ومشاعر مختلفة وتذاكر بقيم واثمان مختلفة لازم تحتك بيها كلها علشان تحس الاحساس الجميل دا —- السعادة ممكن تتحول لعادة لو عاوز تدى لنفسك الحق انك تكون سعيد بالتاكيد لازم تديها علشان تملأ اللى حواليك بيها ويقدروا يدوهالك — انا عارف ان الناس كلها بتدور على كل دا فى اللى حواليهم لكن اللى مش قادرين يفهموه انهم لازم يدوا الاول علشان ياخدوا — لازم يعرفوا انهم ترس فى مكنة كبيرة علشان المكنة دى تنتج وتطلع منتج جيد اسمه السعادة لام التروس كلها (( كلها )) تشتغل وتسلم بعضها الحركة لحد ما توصلنا الى منتج اسمه السعادة ولو فيه ترس بايظ او مكسور او مش قادر يوصل الحركة بتاعته للترس اللى جنبه عمرنا ما حنوصل للمنتج دا مهما حصل — السعادة لو عاوزين نحس بيها لازم نحولها الى عطاء اولا احساس بالاخر اولا منح ورغبة فى المنح بلا تمييز او تفسير للسبب علشان دا كله يتحول فى الاخر الى حالة يعيش فيها الكل — حتى لو صادفت وقابلت حد انانى وحدش عاوز يكوش على كل حاجة لوحدة — مش مهم —- تجاهله ودور على اللى يقدر يحس باللى انت حا تديهوله لانه وقتها مش حا يحرمك منه حا يعيش فيه ويعيشك انت كمان فيه ويمكن اكتر لانه وقتها فهم انه جزء من ماكينة كبيرة بتنتج منتج حلو اوى اسمه — السعادة —
الإثنين, مايو 6, 2024
آخر الاخبار
- الاتحاد السكندرى يشكر غزل المحلة على تهنئته
- الاتحاد السكندرى يشكر نادى الصيد على تهنئته
- الاتحاد السكندرى يشكر النادى الأهلى على تهنئته
- الاتحاد السكندرى يشكر أصحاب الجياد لتهنئته
- الاتحاد السكندرى يشكر سبورتنج على تهنئته
- الاتحاد السكندرى يشكر سموحة على تهنئته
- مفاجأة مصيلحي لجماهير الاتحاد السكندري قبل مواجهة الأهلي
- شباب الاتحاد السكندرى ينتزع بطولة الجمهورية للسلة على حساب الأهلي