قال
لزمايلة وسط الحرب
العالم مايل بالفطرة
للضرب
والخوف
والتخلي
كان يجرى اي مثلا
لو كانت المطرة
تنزل على الناس بالتمني
مش ماية يعني وبس
تنزل حسب ما احتاج
دلوقت انا مثلاً
محتاج سلام
وعلاج
احضن بشوق ابني
محتاج رصاص دايم
مش ضربة ويسيبني
محتاج ابوس امي
بتهور المجانين
قال الوحيد فيهم
يا رب بني آدمين
قال اللي غاوي الحرب
محتاج سلاح جبار
قال اللي غاوي الكيف
محتاج سيجارة ونار
قال الفلاتي بهزار
محتاج تسع نسوان
التاجر الفلاح
محتاج تقاوي الأرض
وبضاعة للدكان
قال الزاهد بهدوء
محتاج اعود إنسان
قال الضعيف مكسور
محتاج لـ بيت وامان
قال اللي كان شاعر
محتاج قصيدة مجاز
اسرد امانيكم
اسرح واطوف بيكم
بعد الحروب والخوف
وسمايا هتمطر
جوه القصيدة حروف
وكأن باب السما في الوقت دا بالذات
كان غير جدير بالقفل
هو الوحيد فيهم اللي قدر يوصل بالامنية للبر
وكتبلي هذا النص
بعديها قام للحرب
زيه كأي ملاك ع الارض دون جناحات
فـ حضن رصاصة ومات