الحب هو أحلى حاجة في الدنيا…
هو سبب وجودنا على الأرض أصلاً.
ربنا خلقنا علشان بيحبنا، وعلشان نعرفه كويس ونعبده ونحبه.
وأجمل هديه تقدمها لحد .. إنك تحبه بجد من قلبك.
بس حبك لأي حد في الدنيا .. أي حد .. مينفعش يبقى أكبر من حبك لنفسك .. أو بمعنى أصح مينفعش تفني نفسك وحياتك وشخصيتك في الآخر .. مهما كان.
لأن ببساطة .. ساعتها الحب ده هيتحول لعبء على الآخر، ونقمة .. لأنك طول الوقت شايف إنك ولا حاجة من غيره .. ودي علاقة مش سوية .. ولا صحية على الإطلاق.
بليغ حمدي قدملنا مثال حلو جداً على الموضوع ده لما لحن لوردة أغنية (كان يا مكان) .. فيها جملة بتقول (حبيبي جيت أنا ليه في الدنيا دية إلا عشان أحبك).
يعني ربط أهميته وسبب وجوده في الحياة، بس بإنه يحبها.
وكان الطبيييييعي جداً تكون الجملة اللي وراها .. (عشان يدوب عمري من جرح غدرك بدري شمعه ورا شمعه وتعيش انت لفرحك).
طبيعي يا جماعة شخص مش شايف لحياته أي قيمة غير بحب الشخص التاني .. فطبيعي التاني ده يدوس ويوجع ويجرح .. وعمره ما يحس بقيمة الشخص التاني .. ولا بحبه!
عشان كده مينفعش تحب أي حد أكتر من نفسك.
مينفعش تربط قيمتك في الحياة، ووجودك فيها .. بوجود الآخر.
الحب عظيم .. والعطاء أعظم .. بس الأفورة وحشة .. واللي بيزيد عن حده .. بيتقلب لضده.
صباحكم سعاده،،،