نبيل سلطان يكتب : ٣٠٠ سنة

تحيرت كثيرا عن ماذا اكتب هذا الاسبوع الأحداث كثيرة
التصديق على قانون السلطة القضائية .
التصديق على قانون الإجراءات الجنائية ..
زيارة بابا الفاتيكان التى اثلجت قلبى كثيرا (رجل السلام فى أرض السلام ) ..
زيارة الرئيس إلى الشقيقة السعودية ..
المطالبة بالمزيد من القوانين التى تسهل الإجراءات اليومية عن المواطن هى الاهم بالنسبة للمواطن فى الحقيقة. وهنا تذكرت رحلتى لتجديد رخصة السيارة التى لا أظن انها ستنتهى قريبا واصل الحكاية ان رخصة سيارتى انتهت ٦ / ٢٠١٦ وكان على تجديدها فى نفس ذات الموعد وذهبت بالفعل إلى إدارة مرور مدينة نصر للكشف على المخالفات ودفعها تمهيدا لإتمام إجراءات الترخيص وكان هذا فى التاسعة صباحا حسب موعد بدأ العمل فى إدارة نيابة المرور مع العلم إن الإدارة العامة لمرور مدينة نصر تبدأ فى الثامنة ما علينا ..
المشهد عدد ٢ شباك للمخالفات على كل منهما عدد يتجاوز الخمسون فرد اى نعم خمسون فرد على الأقل وطبعا كان هناك استحالة فى انتظار انتهاء الطابور والحصول على دور معقول الا بعد ثلاث إلى أربع ساعات على الأقل …. فذهبت وقررت إعادة المحاولة فى يوم آخر …..
وفعلا فى يوم آخر بعدها بشهور ليست بقليلة خرجت من منزلى عند السابعة وذهبت مباشرة إلى باب الإدارة العامة لمرور مدينة نصر منتظرا فتح الباب فى الثامنة على احظى على دور فى أول الطابور للكشف عن المخالفات وها انا امام الباب فى السابعة اى قبل فتح باب العمل بساعتين كاملتين ويا لعجب المشهد …
العشرات امام باب الإدارة لنفس السبب الذى أتيت من اجلة ورجل قد تجاوز السبعون بقليل معة ورقة صغيرة وقلم وكلما اقترب شخص من الباب سأله الحاضرون (مخالفات ولا تجديد ) وطبعا ٩٩%مخالفات
المهم ٧ صباحا حصلت على رقم ٢٢ فى قائمة المنتظرين ودخلنا ٨ الإدارة ووقفنا على الشباك من ٨ إلى ٩ فتح ٩ وربع وجة دورى ١٠ وربع ووقفت ٥ دقايق وبعد التدقيق والذهاب والإياب مع موظف مشهود أو بالكفاءة قال لى عليك ٢٧٠٠ ج مخالفات بس مش بتاعتك وأسقط فى يدى ٢٧٠٠ مخالفات مش مشكلة ما انا ماشى (الوش) طول النهار فى الرادارات مقبول الرقم بالنسبالى بس اية حكاية مش بتاعتك دى ما علينا ….
طب المطلوب منى اية يا عمنا …. اذهب الى إدارة اللوحات واعمل إعادة تشغيل للوحات عشان انت عليك ١٠٠٠ ج بس الباقى دة على الرقم إللى معاك واللى اتنقل لسيارتك عند نقل ملكيتها ….
وبعد كدة امشى وتعالى بعد ١٥ يوم
المهم مشيت من المرور على ١١ كدة تقريبا من ٧ إلى ١١ عشان ارجع بعد ١٥ يوم ….
والنتيجة انى الساعة ١٢ انسحبت رخصتى المنتهية وانا داخل المطار .. وعند حديثى مع ضابط المرور عن إشكالية التجديد قال لى ماليش دعوة روح قلهم كدة (ضحكت جدااا وقلتلة يا فندم القانون فى مصر عامل زى المنخل مايشيلش مية وبعدين على كدة قدامنا ٣٠٠ سنة عشان نحصل اى دولة حديثة ) طبعااا الظابط معجبوش كلامى خالص واعتبرنى بقلل من مجهودة بس الحقيقة انا كنت بسخر من النظام ومن العقلية المنفذة للقانون إللى هو اصلا مش بيتحقق لانى وبمجرد دخولى المطار وبعد حديث قصير مع أحد الأصدقاء جائت الرخصة حتى المكتب الذى أجلس فية احتسى قهوتى مع الاعتذار أيضا عن سحب الرخصة …
وهنا بقى وانا راجع نزلت الظابط ضاحكا وقلت له مش قلتلك قدامنا ٣٠٠ سنة .
الشباك الواحد وربط الخدمات ربط حقيقى بالانترنت مش اختراع والله يا مجلس النواب فى قوانين اهم والله من قوانين الأمن والحكومة تهم المواطن عشان تقلل بس ال ٣٠٠ سنة ..
التوقيع
مواطن