فيه عصفورة كل يوم الصبح تقف على الشجرة مع اصحابها العصافير نازلين زقزقة مع بعض وأمهاتهم وأبهاتهم كل يوم بيجيبوا الأكل ليهم لأنهم صغننين، لكن العصفورة بطلت حكايتنا كانت مختلفة فى تفكيرها عن أصحابها العصافير ؛ كل يوم تبص للسماء البعيدة وتبص على العصافير الطايرة فيها، وفى يوم قررت انها لما تكبر تطير أبعد منهم بكتير لفوق لابعد حتة فى السما وكل يوم بيعدي يكبر ريش العصفورة وتتعلم الطيران وتكبر وتكبر ولسه الحلم مسيطر عليها وفى يوم قررت تعيش حلمها وفضلت تطير لفوق لفوق وأصحابها يندهوا عليها انزلى كفاية كده انزلى وهى كل اللى مسيطر عليها حلمها نفسها تشوف اللى محدش شافه ولا حاول يوصله، ففردت جناحتها لما وصلت للسحاب.
بس خلاص
بتسألوا و بعدين؟؟
للأسف محدش يعرف حصلها إيه لحد دلوقتي لأنها مرجعتش تانى، بس اللى متأكد منه انها شافت اللى محدش شافه من العصافير أصدقائها……
نفسي أكون هى