لسعة مكوه عادل حراز : . حوار مع الندل ميمى بنزيمه !!

..: تصدق فلان ده قطع مره واحده كده من غير سبب
ميمى بنزيمه: عادى ومستغرب ليه ؟ ..بنزيمه خلص
…: بقولك صحبك بتاع العجمى اللي كان ليل ونهار معانا سنه كامله فجأة اختفي
ميمى بنزيمه: تانى بقولك بنزيمه خلص خلاص ..ماهى الناس يا استاذ زى العربيات لما بيخلص بنيزمها بتقف ما تتحركش
…: ياحاج ميمى بلاش شغل الميكانيكه ده بقولك الود بتاع الفراخ بتاع العجمى تقولي زى العربيات
ميمى بنزيمه: بص يا هندزه كل واحد من البنى ادمين اللي قدامك دول جواه تنك زى تنك البنزيم.بيعبيه شويه حب علي شوية هجص على شوية فهلوه ..علي شوية زيت اكل ..علي شوية اونطه, واول ما بتتعرف عليه بيشغلك تنك الحب ..وبعدين تنك الطبطبه ..وبعدين تنك الاخوه بس المشكله ان كل التنكات دية بيبقي فيها يادوبك لتر بنزيم بس , انت في الاول بتفرح فرحة الاهبل وتقول الواد ده رجوله مفيش زيه ومع الوقت تخلص كل التنكات دية ..يبدا بقي الزبون يشحر منك ويقطع يوم ويفوت يوم ويجيلك تالت يوم ..انت بقي بطيبه قلبك تفتح محطة البنزيمه بتاعتك وتعبيله …وزى ما بيقولوا العيال بتوع التكاتك عبيلوا واديلوا..وانت وحظك بقي ممكن بنزيمتك تفضل تديله سنه اتنين عشرة وفي الاخر ماتلاقيش منه غير النداله ..يخلع منك ويسيبك ع الصحراوى يا هندزه..احمد ربك انه خلع بعد سنه وقطع سير المروحه بتاعته اللي كان بيهويلك بيها !
….: يعنى مفيش حد عنده محطة بنزين زي حالاتى كده يفضل يمون في البشر لاخر العمر ؟
ميمى بنزيمه : لاء فيه طبعا
…: فين ؟
ميمى بنزيمه : تلاقيهم يا في مستشفيات المجانين … يا في دار المسنين بس !! اعقل يا هندزه بقي واقفل المحطه وخد بالك من عيالك !!
…..: وانت عايش ازى يا حاج ميمي وانت عندك محطة بنزين
ميمى بنزيمه : اللي بيدفع ويأبجنى بموله وعبيه واديلوا… فول تانك …الدفع مقدما ياهندزه
……: ده لما بياخد بنزين لعربيته انا قصدى يعنى في مشاعرك وانسانيتك
ميمى بنزيمه : نعم !!!!!!؟؟؟؟؟ المشاعر دية انا حلقتها من زمان عند يوسف الحلاق قلبى بقي زيروووو مافيهوش ولا شعره مشاعر … والانسانيه دية بعتها في سوق الجمعه ماجبتش غير سيجارتين بس !! امال انا عملت محطة البنزيم منين؟؟؟!!! زى ما بقولك كده اقفل محطة البنزيم بتاعتك
…: انا حولع في ميتين امها مش حقفلها بس !