علي طبلية الحاجه عادل حراز يكتب : الليمون المعصفر ومية اللفت !!

بعد ليلة النصف من شعبان كانت معظم البيوت المصريه تستعد لعمل مخلل رمضان من زيتون اخضر الي ليمون معصفر الي لفت مخلل وتبدأ كل اسرة تشترى تلك الاشياء وتحضر البرطمانات الزجاج البرميلية الشكل وتشترك البنات والسيدات في عمل وجبة المخلل البيتى التى سوف تستعملها الاسره خلال شهر رمضان المبارك ومنهم أسر كانت تعمل حساب من تلك الوجبات للاقارب والجيران والاحباب .
كانت البدايه بشراء اللفت اولا والبنجر وتقوم الاسره بتجهيزه وتقطيعه مع ثمرة بنجر ووضعه في البرطانات الخاصه به , وكانت الجدات يحرصن علي الاكثار من مية اللفت المخلل لانها سوف تستعمل قبل رمضان بثلاثة أيام كنوع من انواع ( الشاربه ) لتنظيف المعده قبل الدخول علي الصيام فتقوم الجده او الام بعد ان يتم سواء اللفت المخلل ويتحول ماء اللفت الي اللون البمبى الجميل بعد اضافة ثمرة البنجر ومعلقه صغيره من الكراويه ذات الرائحه الجميله بأخذ كبايه كبيره من ماء اللفت ويقوم كل فرد من افراد الاسره بشرب ماء المخلل !
وحدث ولا حرج بعد يوم واحد من شرب مية اللفت فنبدأ المعده تشتغل وينزل منها بلاوى تعابين ولاتعابين سحرة فرعون , ماهو طول السنه العيال وابوهم وامهم عمالين يحشوا من كل نوع ايش فلافل وايشى عجه وايشى بيض وايشى لحوم وايشى فراخ ! طيب ايه اللي هيزيح تلك البلاوى غير مية اللفت يابن عمى ؟؟
علشان تدخل علي صيامك صاغ سليم !
ثم تبدأ مرحلة تمليح الزيتون الاخضر وده برضه له صنعه وحرفيه شديده في تصنيعه المهم يكون محتفظ بجزء من مرارته الجميله ليفتح النفس علي الفطار مع اضافة نوع من انواع الفلفل الحار علشان العيال السوسه اللي ينزل علي برطمان الزيتون يمرش امه في الاسبوع الاول من رمضان وبخاصه العيال اللي بتكون صايمه نصف يوم بس , تلاقي العيل رايح جاى علي برطمان الزيتون المخلل من غير ما حد يشوفه .
المرحله الاخيره وهى مرحلة الليمون المعصفر الذى يضاف اليه العصفر من عند العطار وقليل من الشطه وقليل من حبة البركه , والليمون هو اكثر انواع المخللات المتصدرللمائده المصريه ويبقي شكله جميل جدا داخل البرطمان ممكن تاخد معاه صورة سيلفي وتبعتها للمزه علشان تبين لها ان امك بتعمل ليمون معصفر احسن من حماتك !
وقبل رمضان بيومين تلاته تقوم الاسر بعمل الخيار المخلل لانه سريع التمليح وطبعاا الخيار بيبقي عمره قصير هما يومين تلاته ويتم نسف برطمان الخيار وبخاصه في السحور مع الفول وبخاصه للاخوه اللي ناويين يفطروا تانى يوم ويتحجج ويقولك معلش اصل انا ضربت نص كيلو خيار في السحور وهموت من العطش !
منهم من كان يجهر بذلك الفطار من الشباب ومنهم من كان يشرب كتيمى وهو عامل نفسه بيتوضا لصلاة العصر يضربله بقين ميه من تحت لتحت !
رمضان كريم .. خفف من المخلللات علشان تقدر تكمل يامعلم .