عادل منير : يكتب علبة الوان
وشوش الناس
بتتلون بكام ميت وش
إرادة بليدة
بتعاتب حاضرنا الهش
في لعبتنا الملك لو مـــات
بييجي العسكري ويقش
(( ما تتخضش ))
قلوب الناس بتتلون كما التعبان
وشوشهم علبة من ألـــوان
عظيمة بلدنا بلون الغش
عساكر ع البيبان بتدور
تخاف الضلمة لو صادفت
شعــاع من النـــور
شهادة في محكمة بتدين
شهادة زور
وكلمة حق مكتومة عشان خايفة
وعين بتنام مظلومة عشان شايفة
بيادة عسكري فى الجيش
علي راسهم ومرفوعه
وعادي أموت عشان معييش
بصرخة شبه مسموعه
بموت في ميدان
وببقي جبان
أعيش ميت
أموت إنسان
أموت عايش
وأكون متهان
دنيا غرورة وطبعها خوان
دنيا تعلي كل واحد خان
ويا بلدي
تعبت خلاص من الأعذار
دبيحة وتحت أيد جزار
وراضي برده بالأحكام
ولابس بدله الإعدام ومستني
يجييني الموت بيتزوق وبيغني
ويطلب إيدي من الدنيا
تروح رايحة الحياة مني