عادل حراز يكتب : الاحتواء هو الحل !

الاحتواء كلمه حروفها من نسيج الروح، والنقط فوق حروفها نبض قلب !
هكذا علمنى حبك معنى الاحتواء !
الله يرحمك يا امه … كنتى جامعه من العلوم الشعبية ولا جامعة السربون ! وكان ليكى فلسفة بسيطة تحل اصعب المسائل الحياتيه والاجتماعية بكلمه واحده او كلمتين وبتعرفي إمتى تضربي غطس اسكندرانى في بحر الانفوشى الشعبى علشان تغوصى جوه محار الزمن وجوه محار البشر وتطلعى بلؤلؤة الحكمة لتضعيها امامنا كمثال حى لحل اى مشكله من المشكلات التى كانت تواجهنا كأسرة او كانت تواجه المجتمع بأسره لتعلمينا ببساطة شديدة إن من فات قديمه تاه !!
كنتى تبدأى حكمتك قائله : صلي علي اللى حيشفع فيك يوم القيامه .. بص يابنى علي الدقيقه اللى بتفرق بين الليل والنهار ولو مش صاحى وقادر تبص… اسمع !
….: اسمع ايه ياحاجه ؟
….: تسمع الديك وهو بيدن قبل الفجر … والديك بيدن كوكو كوكو في الفجرية … عارف ليه الشيخ سيد درويش بقي فنان الشعب بجد من كلمة واحده بس .. هى الديك بيدن كوكو كوكو …عارف معناها ايه الكلمه دية … الكلمه دية غير المعانى الكتير اللي بتحملها بس اقوى معنى ليها هو ( الاحتواء !!!)
……: ازاى يا حاجه ؟؟ فهمينى ؟؟
…..: اطلع يابنى علي سطح البيت وافتح عشة الفراخ بعد الديك ما يدن بنص ساعه بس .. حتلاقي الفراخ كلها صحيت وكل فرخه واخده وراها كتاكيتها وطالعه من العشه علشان تلقط حبات الذرة !!
كله بيتجمع حوالين الفراخ الامهات في حلقة الاحتواء الاولي لبداية اليوم مش حتلاقي كتكوت واخده له حبيتين ذرة ورايح ياكلهم بعيد… مستحيل تشوف المنظر ده …
حتلاقي كل الكتاكيت ملمومين في دايرة واحده حوالين الام , علشان كده يابنى كل الكتاكيت بتكبر وتبقي صحتهم زى الفل , قيس بقي المشهد ده علي كل الحيوانات والطيور وقيس نفس المشهد علي الاسرة المصريه البسيطه..
كل ده جاء من نداء الديك كوكو كوكو !!
رب الاسره اللي بيقوم يصلى الفجر حتى لو صلاه في البيت .. صوت الله اكبر داخل المنزل هو نداء الاحتواء اللي بيخلي ربة المنزل تقوم زى الرهوان من الفجر وتحضر الفطار .
وصوت الله اكبر في حرب اكتوبر هو كان نداء الاحتواء اللى جمع كل الشعب والجيش وربنا نصرهم وكسروا الغرور الاسرائيلى وعبروا خط بارليف ..كلمة واحده الله اكبر لكنها كلمه تنصرك علي كل البشريه حتى ولو كنت بتحارب بمفردك هى كلمة السر في الدعوة الاسلاميه كلها .
واعتقد ان الكلمه دية هى سر نجاح ثورة 30 يونيو عندما طالب السيسى الشعب بالنزول والالتفاف حول الوطن واحتوائه من المؤامرات الدنيئه التى كانت تحيط به !
سيبك بقي من فطار الايام دية بتاع كنتاكى وبيتزا هات وساندوتشات التيك اوى السريعه وكيس الشيبسى … فطار الايام دى فيه تفرقه كبير مافيهوش احتواء … الناس يابنى بقالها 30 سنه واكتر بترضع من الكياس النايلون !!!!
عمرك شوفت كيس نايلون بيديك حنان ؟؟!!
عمرك شوفت زجاجة عصير او علبة عصير جاهزه حتروى قلبك ؟؟
الحنان والاحتواء في الايادى الطيبه اللى بتصنع فطارها في المنزل … الحنان والاحتواء في طبطبة الام وحنان الاب ونظرة عينه اللي بتقول كلام كبير من غير ما يتكلم …. لما الاب يبص علي الطبليه او ترابيزة السفره ويقول بصوت هادى هو الواد محمود ما فطرش كويس ليه انهارده ؟؟؟ ماله ؟
كلمة ماله دية هى بداية خيط الحنان اللي بتشوفه الام ان محمود مش مظبوط فيه حاجه ؟ تبدا الام تدور ع السبب وتشوف وتعرف وتعالج قبل ما يستفحل المرض .
وأخطر أنواع الامراص التى تصاب بها الاسره المصريه هى عدم المعرفه …ليه محمود ما فطرش كويس ؟
بمنتهى البساطه … هى دية الفلسفه والحكمه اللى بتخلي الحاجه اللي يرحمها تضرب الغطس الاسكندرانى وتبحث وتدور .. وتعرف ان حوده بدأ ينعزل عن الاسره وبدأ ينتمى الى اسرة الشيبسى اللعينه … واختار لنفسه اب غير ابوه .. اختار ان تكون علاقته الابويه مع ساندوتش باتيه بالجبنه وان اخواته مش هما اللي قاعدين معاها علي ترابيزة السفره هو بيبص لبعيد واختار اخوه غير اشقاء من باكو الكاتشب !!
انفرط العقد ومابقاش فيه احتواء ..
كله راح يبحث عن الاحتواء عند كارفور وفتح الله وفرج كله ومؤمن !!! وللاسف مش بيلاقيه .
ومع مرور الوقت تصبح ترابيزة السفره في المنزل فارغه من اى احتواء غير تلك الفازه البلاستيك التى توضع عليها تنعى الزمن الجميل … واتنتقل الطبليه بقدرة قادر الي بائع الروبابيكيا !
وتبدأ أمراض العصر تهاجم تلك الاسره المصريه من جميع منافذ البيع للسلع الاستهلاكيه !
وتبدأ الزيارات لكل الاطباء في جميع التخصصات وعمل التحليللات لمعرفة اسباب الاكتئاب ..
وتبدأ رحلات الاشعه المقطعيه من اول المخ لحد الكبدة والطحال ولا احد يعرف سبب المرض الحقيقي .
العلاج ابسط مما نتخيل ..انه الاحتواء … الاحتواء الاسرى .. الاب الام الجد والجده وباقي افراد الاسرة من خالات وعمات والاقارب … صلة الرحم .. تلك الصله التى قطعنا كل اوصالها بجميع انواع السكاكين العصريه ومفارم اللحم وخلاطات الندالة !!
واصبحت العلاقه بيننا وبين اقاربنا المقربين زى العلاقه بين المشترى والكاشير في محلات كارفور …. ادفع الاول قبل ان تخرج وانت محمل بالمشتريات !
التعامل معك يتم حسب حجم الاحتواء المالي الموجود في جيب بنطلونك او في شنطة يدك يا سيدتى … او عن طريق الفيزا كارت !!!
بس للاسف عمر الفلوس ما حتطبطب عليك ولا حتقولك مالك ؟؟؟ ولا عمر الفيزا كارت حتحس بأنك عندك جفاف اسرى وعاطفي .
لكن نظرة الاب الحنين وطبطبة ايد الام واحتوائها لك ولهم هى الفيزا كارت التى لا ينضب نبعها ابدا… لانه نبع ربانى … رصيد الهى الي يوم القيامه !
حتى بعد وفاة الاب او الام والجده والاجداد تظل الدعوات الصادقه التى تحميك من برد الزمن وجوع المشاعر !!
الله يرحمك يا امه دايما كان عندك الحل في كلمة واحده … الاحتواء