محمد عبيد يكتب : مهزلة اسمها دولة

0

 

 

فعلاً ,,, حاجات غريبة جدا بتحصل ,,, اساساً مش لازم تمر كده مرور الكرام ولازم كلنا نتكلم ونهرى ونفضفض ,,, لازم كلنا ( اتكوا على كلمة كلنا دى مهمة جدا ) نخوض فى التفاصيل ونفهم ايه اللى بيحصل كويس …….احنا بقالنا شهر تقريبا بنتكلم فى الكورة كأس العالم اعطانا الفرصة نتكلم فى كل النواحى الفنية والخططية وحتى المالية الخاصة بعقود اللاعبين العالميين والمحليين كمان ,,,,, ولما قرب كاس العالم على الانتهاء صعبنا على الخطيب ومرتضى منصور وتركى أل شيخ وشوبير اننا نقعد فاضيين فبصراحة ملوا وقت فراغنا بأحداث خلتنا نكمل ,,,, نكمل هرى وكلام وهرتلة وتعبير عن قمة ( خدوا بالكم من كلمة قمة دى ) جهلنا وفوضويتنا وغبائنا وفشلنا ورخص كل حاجة وحد مننا ,,,,,,,,شوية ومعز مسعود اتجوز ( بيقولوا انها الجوازة التالتة عقبالى يارب ) اتجوز شيرين عادل بتقولوا مين يا ولاد شيرين عادل الممثلة المتبرجة ( عفوا على الكلمة ولكنها الكلمة الدارجة فى الاوساط التى يقال عنها انها اوساط دينية ) بتقولوا مين شيرين عادل طب ايه يعنى ما يتجوز وهى كمان يعنى عامية انها تتجوز معز مسعود الواد الصغير الامور اللى البنات بتكتب له على صفحته قصائد الحب والهيام والغرام المهم خلونا فى المهم الموضوع يعدى لأ طبعاً مش ممكن يعدى ازاى لازم نتكلم ونعبر عن قمة ( خدوا بالكم من كلمة قمة دى ) تديننا وسخطنا على ما فعله هذا الزنديق الفاسد المنافق الذى يتكلم عن الحجاب والعفة ( مش عارف رابطين ليه الحجاب بالعفة ) المهم قطعنا الاتنين رغم اننا لازم نشفق جدا على شيرين لاننا بنحس لما بتطلع على الشاشة انها واحدة مننا وانها وقعت فى براثن شاب مزواج لكن عموماً خلونا ندعيلها بالسعادة وربنا يهدينا احنا ,,,,,,, نخش بقى على المهم انفجارات وحرائق وقطارات بتخرج عن القضبان والمترو كمان كل دا والحكومة شغالة على راحة راحتها وكل همهم ان السلام الجمهورى يشتغل الصبح اول اليوم والناس تردد النشيد الوطنى احياء لروح الوطنية وتعظيم دور الوطن ,,,,,,,, اطفال مخطوفة واطفال محروقة وحوادث تصادم لا حصر لها وملايين البشر موجودين بالاسكندرية يقيمون شعائر المصيف اللعين غير عابئين بالاسعار المولعة نار واننا مش عارف نتحرك فى مدينتنا علشان نحاول ناكل عيش او حتى نشم شوية هوا نضيف بدل الزبالة اللى ملوا مدينتنا بيها ,,,,,,واصحى امبارح الاقى السجاير غليت وأسأل ليه ياولاد يقولولى علشان التأمين الصحى بتقولوا ايه يردوا يقولوا التأمين الصحى حا يتعمل لينا كلنا بتقولوا للشعب كله يعنى يردوا يقولوا آآآآآه طب اذا كانوا مش عارفين يحسنوه للى موجودين تحت مظلته حوالى 32 مليون يقوموا يخلوه لل 100 مليون طب ازاى بس حد يقولى ازاى عاوز افهم دى المستشفيات مفيهاش حتى شاش وقطن ,,,,,, لكن كله كوم واللى حاتكلم عنه دا كوم تانى — الموضوع دا تحديداً خلانى واقف مذهول بجد وقفت قدام نفسى مندهش منها اوى هو انا ازاى كده هى الدنيا حواليا ليه كده ,,,,, مدير فرع بنك حول لنفسه ( بطريقة غير شرعية ) 180 مليون جنيه من حسابات المودعين وهرب ,,,,, نعم هرب هذا الشاب الناجح الجميل الذى كان يضع بطاقته الائتمانية كل اول شهر فى ماكينة النقود لينزل منها اكثر من 15000 جنيه مصرى هو متوسط قيمة راتبه الشهرى فى البنك الذى يعمل به ,,,,,وتسائلت ماذا كان ينقصه كى يفعل ما فعله ؟؟؟؟ لما اصبح الشرف والأمانة شىء لا يهتم به احد ؟؟؟؟ لما انحدرنا الى مثل تلك الهاوية من كل هذا الجهل والفساد وانعدام القيم والاخلاق والامانة والشرف ؟؟؟؟ رغم اننا لا نرفع الا رايات الدين والتدين والعفة والشرف لماذا اصبحنا من المجتمعات التى لا يمكن وصفها الا بالمجتمعات المنافقة النافقة العاجزة حتى عن اصلاح ذاتها رغم كل المحاولات التى اصفها انها محاولات للاستهلاك المحلى وتجميل وجه مجتمع كريه ملىء بكل شرور العالم بل انه المجتمع الوحيد الذى تجتمع فيه بلا جدال كل شرور العالم ,,,,,,,,,,,,,,,,لا أعرف كيف انهى كلماتى الدامعة ولكننى اذكر كلمات الله سبحانه وتعالى
{ بسم الله الرحمن الرحيم }
“ربنا لا تؤاخذنا إن نسينا أو أخطأنا،
ربنا ولا تحمل علينا إصراً كما حملته على الذين من قبلنا،
ربنا ولا تحملنا ما لا طاقة لنا به”
صدق الله العظيم

بقلم محمد عبيد

اترك تعليق

يرجي التسجيل لترك تعليقك

شكرا للتعليق