تحت التراب فيه شهيد
رافع ايديه وبيستغيث ويقول
ان الوطن حكموا الخبيث والغول
وان المواطن طعمهم ف الحشا
فيه ناس ف بلدك ماتوا بس عشان
مالاقوش يجيبوا العشا
لسة الحيطان بوادانها ما اتقطعتش
لسة الغراب بيحوم .. والمعركة اتأزمت
سكت الهتاف .. والبندقية اتكلمت
ازاي هترفضهم؟
هما اللي حاميينك
ازاي هتتكلم؟
هما اللي صارفينلك
وازاي هتتشرط
هما القرار والدار .. والثورة والثوار
هما المدار لو دار علينا الزمن
70 سنة والبدلة دي بتؤتمن
والكرسي متحاصر بالخوذة والأيش
70 سنة والموت على الشاشة
70 سنة بيمجدوا الباشا
ويسطروا التواريخ
بأيادي مصنوعة
70 سنة والكلمة ممنوعة
وايادي مرفوعة تهتف باسم الظلم
ويحيوا بالاعلام ..
بيسكتونا بنغمة الأرهاب
وبيدبحونا بوهم اسمه سلام
علق يفط يرضى عليك البيه
علم عليه .. وارضى القرار لو تم
وانت بترقص بس خد حذرك
الارض لسة عليها اثر الدم
تحت التراب فيه شهيد
رافع ايديه وبيستغيث ويقول
ياللي حلمتوا تكملوا
الراية لسة بتفتح السيرة
والسيرة عايزة مسيرة نسلكها
لسة الطريق ف اول الرحلة
والوحلة عايزة الحبل بالأوتاد.
ياللي حلمتوا تكملوا
شوفوا المشاهد بس عينكوا على اللي فات
كل اللي مات كتفوا .. مع كتفكوا ف الدرب
يحميكوا وقت الضرب
ويشد ليكوا الأزر
المركبة .. زايد عليها الحمل
والغلطة م الربان
كل اللي سابكوا وراحلهم دة جبان
والموت بييجي بس من نحية
لازم يموت الغول قبل اما يبلعكوا
لازم يموت … بس الوطن يحيا