في الوقت الل احنا كمصريين اهتمامنا الوحيد هو عبد الله السعيد وهل فعلا هيتباع ويسيب الاهلي ولا لأ واحمد فتحى عمل اية ومرتضى بيقول اية وموسى عمل اية . و هل يوم انتخابات الرئاسة هيكون اجازة ولا نص يوم وهل الرئيس هايكسب ولا هايفوز وعدد اليفط فى الشوارع كفاية ولا محتاجين زيادة والبحث عن شوارع وسط اليفط والحاج سيد الترزى يؤيد الرئيس المؤمن (محمد عبد الفتاح السيسى) والله بجد فى ناس كاتبة كدة ماعلينا ……..وحاجات من النوع دة كتير …. قوى .. والخ الخ الخ ………
على الجانب الاخر من كوكب المصريين .
العالم كله مترقب حدثين اهم ألف مرة من كل الهرى المبرح دة .
اولهم : حادث اغتيال الجاسوس الروسي سيرجي سكربيل وبنته يوليا في بريطانيا،
ثانيهم : ترامب وافق على الاجتماع والمفاوضات مع زعيم كوريا الشمالية كيم يونج اون لأول مرة في التاريخ
قصة اول خبر بدأت سنة ١٩٩٠ لما بريطانيا نجحت في تجنيد سيرجي اللي كان ظابط صغير في المخابرات الروسية للتجسس لصالح بريطانيا وتسليم معلومات عسكرية مقابل ١٠٠ الف دولار،
في ٢٠٠٦ سيرجي كان عقيد في المخابرات، لكن امره اتكشف واعتقل واتحاكم وادين بالخيانة العظمى واتجرد من كل الاوسمة والنياشين واتحكم عليه ب١٣ سنة،
سنة ٢٠١٠ الرئيس الروسي ديميتري ميدفيديف اصدر قرار بالعفو عنه بعد اتفاق مع بريطانيا على صفقة تبادل جواسيس، اربعة من الجواسيس لصالح بريطانيا وامريكا مقابل تسليم عشر جواسيس لروسيا اتمسكوا في امريكا.
وصل سيرجي بريطانيا وخد الجنسية الانجليزية وقرر انه يعيش في حاله خصوصا ان ابنه واخوه ومراته ماتوا،
بنته بقا الوحيدة يوليا اللي عايشة في روسيا الشهر ده قررت انها تزوره في بريطانيا، وفعلا راحتله بعد ٨ سنين مكنش معروف مكانه .
من اسبوع كدة دخلوا مطعم عشان يتعشوا وخرجوا ، بعد شوية الناس لقتهم امام المطعم ميتين.
وخدوهم عالمستشفى .
بعد الكشف عليهم والتحقيق في الواقعة الشرطة طلعت بيان انها محاولة اغتيال بغاز الاعصاب ومن النوع اللي بتستخدمه روسيا بس .
طبعا بريطانيا قلبت الدنيا رأسا على عقب ازاى روسيا تتعدي على مواطن انجليزي على ارض انجليزية،
وبعدها طلع البرلمان البريطاني ووزيرة الخارجية تريزا ماي يطلب من روسيا تفسيرها لاستخدام غاز الاعصاب هناك خصوصا انه اثر على الموجودين وكان منهم ظابط خدمة جنب المطعم .
وعليه قررت بريطانيا الرد، فاطردت ٢٣ دبلوماسي روسي من اراضيها، وجمدت ممتلكات روسية واعلنت انسحابها من كاس العالم ٢٠١٨ ومقاطعتها للمونديال .
انسحاب بريطانيا يمكن يؤدى الى انسحاب حلفائها .
وممكن جداا كاس العالم يتلغى
فرنسا وامريكا مؤيدين لموقف بريطانيا .
اما الجانب الروسي رافض تماما الاتهامات ووعد بالرد على التعسف البريطاني . ومجلس الامن ادخل .
ولو الموضوع استمر على كدة احتمال تبقى بذرة حرب عالمية بين بريطانيا وروسيا واهلا بالدمار.
اما عن الخبر التاني الخلاف بين كوريا الشمالية وامريكا راجع لتاريخ تقسيم شبة الجزيرة الكورية لدولتين الجنوب حليف امريكا والشمال حليف روسيا والخلاف بينهم كان خلاف روسي امريكي من الاساس .
ولان كوريا الشمالية تمتلك نووي اذن بتشكل خطر كبير جدا على العالم كله .وفي اخر كام سنة بعد تولي كيم يونج شئون كوريا الشمالية بدأ كيم التهديدات لأمريكا بالنووي واقامة الاختبارات النووية على الملأ كرسائل تهديد لأمريكا ولان امريكا ونظامها ليس لديهم القدرة على تحديد قوة كوريا الشمالية بالظبط فكانت تتبادل الاتهامات معاها.
كوريا الشمالية في حالة حرب مع كوريا الجنوبية دائمة.
المهم كيم يونج اون اتصل بترامب وقاله انه على استعداد لمقابلته والتفاوض على نزع النووي من كوريا كلها . وترامب وافق ييقابله ودة هيكون اجتماع تاريخي بعد كل السنين دي وهيحضر الاجتماع رئيس كوريا الجنوبية كمان .
الاجتماع ده يخوف انه ممكن يقود لمصالحة امريكية كورية جنوبية لتحالف الدول دي مع بعض . والخوف انهم لو اتحدوا فى احتمال كبير امريكا تسلط كوريا على الصين لانهم مسيطرين على الاقتصاد العالمي ودة خلى امريكا مركز تاني في العالم .
وده بردوا خلى الصين تترقب جدا اللقاء ده وتبدأ ترسل تحذيرات وتنبؤات من دلوقتي على انها هتفرقع فينا كلنا، والحرب جاية جاية.
السعودية كمان قالت انها هتمتلك قنبلة نووية لو ايران امتلكت القنابل دي . والسعودية وايران في حرب سيطرة نفوذ وسلطة من سنين طويلة .
والنار والعة فى سوريا وفى اليمن على الاخر واجتماعات متواصلة مع الحوثيين ومع المقاومة المزعومة فى سوريا ..
كل دة واحنا فى عالم تانى ..
افيقوا يرحمكم الله العالم على صفيح مولع نار واحنا بنرقص فى اللجان ..
التوقيع
مواطن