شوفتوش بلياتشو مكشر وسط العرض !!
دايما راسم ضحكة عريضة
سايب حُزنُه ف اوضة المكياچ
بيوزع فرح لناس ببلاش
مع إن الفرح اللى ف قلبُه
محتاج يدخل غرفة إنعاش
ذَلِك إن عاش
صدقتونى !!
كان اخر عرض
ضحكته كت زيف
نظراتهم ليه كت زى السيف
كان حاسس انه اليوم ك الضيف
و برغم اننا شهر أغسطس
و ف عِز الصيف
البرد محاوط أطرافه
و مغير شكله و اوصافه
شاور بإيديه بيودعهم
فاكرينه رايح ع الكواليس
و لكنه حريص
نبضُه ينتهى بين جمهوره
مع اخر لقطات من دُوره
و جميعه هيخلص م الكوابيس
مش كل اللى بيضحك فرحان
مش كل الباكى أكيد دا حزين
أنا و انت و هو أكيد إنسان
عارف بيقول و بيحكى ل مين
مش كل ال س
يجاوبها بجد
و لا كل ال seen
بعدها فى رد
يمكن زعلان مضطر لـ ضِحِك
مش عايز يصعب يوم على حد
مش كل وشوش الناس دى نفاق
خلينا نرتب ف الأوراق
و إن صدرك ضاق
ف متسمعليش
بالفرح بعيش
بالحزن بعيش
مخلوق من طين
مش قش و خيش
بكدب احيانا و لكنى
احلامى بيسبقها تمنى
عصفور كان طاير بيغنى
و غناه كان اه
كل اللى بيسمع مستمتع بيقول الله
لكن العصفور كان متألم
لا بيعرف يحكى و يتكلم
و مفيش جواه
غير أنه يكمل ف غُناه
قالوا بإن الإحساس نعمة
نتمنى الكل يقدرها
و يطوف ف رحابها و مدارها
اجعل قلبك من زوارها
خليه دايما مليان إحساس
خليك دايما شاعر بالناس
#ولاء_الدين_فاروق