لحظة بزوغ الشمس فوق النيل
صوت الشوارع دندنة مواويل
وانا كنت واقف ضفة التحرير
والنيل ماكانش بيبتسم ليا
كانت ابتسامته لضفة الجيزه
و وجيزه نظرة عيني ماتجيبهاش
ف ازاي ملامحك شفتها بوضوح
طاله كطلة شمس هذا اليوم
ناعمه ومريحه لفص نني العين
انا تهت لحظتها ما بين امرين
هو انتي فعلا كنتي طاله هناك
ولا بواقي من منام الليل
عدى ورايا شخص صوته اجش
سارح بفل باينه او مناديل
وانا كنت نازل يومها باتمشى
هشه الحياه على انها تعدي
او يمكن احنا اللي بروح هشه
مش باقي مني يدوبي غير قشه
وانا عارف ان القشه ماتنجيش
ولكني شابط فيها متعشم
انا ليا رب كبير مايسيبنيش
بصيت لنهر النيل وانا بضحك
ولكنه كالعاده ماعبرنيش
بصيت بعيني في المكان ليكون
في حد تابع موقفي المحرج
مالقيتش اشخاص في المكان الا
انتي وانا وحبيبة الكورنيش
وبدون ما اعدي لبرك التاني
وبدون ما اقولك تيجي او ماتجيش
ضميت ضلوعك دوقتها بعيني
وانا عيني لسه عفيفه مابتأذيش
كات بنت بتبيع ورد في بلاستيك
عماله تترازل على المخاليق
لا البنت كانت خارجه برضاها
ولا قلبي صدق ان بينا غريق
وخدتني شهوة روحي اعديلك
خطيت لقتني في شبر ميه غرقت
وساعتها بس انا للاسف صدقت
انا وانتي بينا حدود ماتسمحشي
ولا حتى خطوة قرب بينا تزيد
كان في فلوكه ماشيه بتزمزأ
صياد ورامي شبكته يسترزق
اتنين هنا واقفين في هذا الركن
بيغفلوا المخاليق ويخطفوا حضن
الشوق غلبهم طولوا ف بوسه
والبنت لسه هناك بتاعة الورد
عماله بترازل في خلق الله
اتوبيس تلت سبعات اهوه معدي
مش خطه لكن بيتي اخر الخط
انا نفسي ارسى بقلبي قي محطه
انا قلبي ياما اتشال وياما اتحط
شخبطت فيه باسامي ياما بنات
عدوا وسابوه وياريتني ما شخبطت
النيل رفض يحضني بارادته
وارداتي كانت حالفه اني جبان
هيبان اكيد في عينيك حنين ليها
فاياك يعدي من ازاز عينك
ملعون ابو اليوم اللي حبيتها
بتعيش حياتها انت البعيد فينك
#حسام_عادل