نَص نتقابل فوق
من ضمن القوانين الثابتة
لبقاء الكورة الأرضية
كل اللي قالولك هنكمِل
هنكمِل كانت وهمية
دورت ف ناس ..ملقتش أساس
هيطوّل ويعيش جمبيا
وحبيبتك ؟ …مالها
كان المفروض تفضل جمبك
ماهي مش غلطت
وقالتلي الذنب ده كان ذنبك
انت اللي ضعيف
وهوائي جبان وبميت كلمة
وبتتعب ف الاخر قلبك
ودي اخر حاجة اكتبهالها
يمكن زعلت من تقصيري
وعموما مش عارف مالها
غمضت وقولت …..
ف بداية اليوم
بصحى علي صورتك كالعادة
وبنام وبقوم
وافتكر إن إحنا بعدنا خلاص
وافتكر المشهد ف التوديع
ايام ما كلامك كان كرصاص
تقريبا يعني بدأت أضيع
ولا لاقي لبُعدنا ده إفادة
ف نهاية اليوم
توجعني مشاهد مِتعادة
أسمحلي ارتاح !
أيوة اتفضل
على مد الشوف
برمي بنظري
بسرّح والمح
وبـ بُص واشوف
شبابيك وبيبان
أشكال والوان
مسرح .. جمهور
وإضاءة خفيفة بتتحرك
واقف وورايا كمنجاتي
يعزف فأبكي
وابدأ أحكي
واسرِد قصتنا الأزلية
بيعدي الوقت
واكتشف إني يمكن صدقت
بسمع نفسي ولأول مرة من بره
وببص لنفسي من تاني
بلاقيني وقعت علي المسرح
ومحدش قام لجل يشيلني
والمسرح ولّع مالتسقيف
لسة فاكرين اني بمثّل
بنده وبسرعة وسط الناس
إسعاف .. إسعاف
لكن اتضح اني ..شفاف !!
كل الموضوع
عقلي الباطن لساه بيخاف
وبيبعد دايماً تدريجي عن اي خلاف
برجع تاني وافتكر اني
ف عيادة أصلاً مالاول
يمكن تأثير جلسة وطوّل
أو يمكن شخصي واتحوّل
فأعذرني ياريت
أنا ياما بكيت , وحكيت وشكيت ,
وسمعني الحيط , وكتير مليت
فرفعت ايديا لفوق ودعيت
إهديني يارب
واختارلي الأنسَّب والأحسن
لو حب او مال او راحة بال
وارزقني بمُتعة حُضن حلال
مهدلي طريق
وافرجها بأيدك لو مرة روحي هتضيق
وابعد عنّا ..
ابو الفين وِش , صاحب بيغِش , والقلب الهَش
وارزقنا بناس
تِعرف فتحب , تعرف فتصون
وابعدنا عن كداب بيخون
وابعدني عن شاعر ممحون
يكتب للناس وبأساميهم
واختارلي أحسن من فيهم
يفضل جمبي
وان كان مفهمش , لا متجبهمش
هفضل وحدي , هفضل وحدي
بتوّنس بالاوضة وكتبي
ورسم الحيطة
سامع زيطة ؟
ايوة دي روحي …
إطمِن شكلي ف اواخري
متشكر ليك دكتور فخري
ده لأنك لسة بتسمعني
كان نفسي اجيلك من تاني
لكن تأخيري هيمنعني
وانا هستناك .. واكيد هتروق
ف رعاية الله
نتقابل فوق …. نتقابل فوق
***