باتخيّل
إني رجعت عيّل و حُضنِك اُمي و أماني
كإنك لما زورتيني بقيتي الدُنيا و زماني
كإنك حِلم ..
كإن الدُنيا وياكي .. باعيشهّا فـ فيلم
بحبِك زي ما لَقيتِك
و قد ما عِشت حبيتك
اعيش لِك دُنيتي فـ بيتِك
و أكون لِك حُضن لما الليل
يعدّي عليكي و يليّل
فَـ باتخيّل
لو الأيام ماجمعتناش
و كانت دُنيتي بدونك
هاحب الدُنيا يعني ازاي و انا حبيتها فـ عيونك
لَقيتِك كُل ما اتمنىٰ كإنك جاية مـ الجنة
حورية فـ شكل إنسانه و جيتي من السما مِنّه
هدية ربنا لواحد دَعا من قلبُه يلقاكي
خاصمني نصيبي مرة زمان و صالح قلبي بهواكي
جميل الوقت لما يفوت و فجأة يبدّل الحُسبان
ماكُنتش فعلاً اتصور بإني لسَّه فيا مكان
لحد هاييجي و القىٰ معاه بإن الصبر يستاهل
و إن الحُزن هيفارق لما عيوننا تتقابل
و اشوفك وقت لما احتاج
احس الراحه فـ عينيكي
كأن عينيكي ليا علاج
شفايا لمسة بـ إيديكي
فـ وقت ما همي فجأة يزيد
باجيلك باكي و باميّل..
ف باتخيّل ..
جمال الفرحه فـ عينيكي فـ وقت ندخلوا بيتنا ..
و زعلّك فجأة لو مثلاً حصلت حاجة ضايقتنا ..
و خوفك لو قابل خوفي و يقلّب يومنا كُلّه خناق
اصالحك وقت قبل النوم
و اقولك ربنا قد شاء
اكون لِك اب قبل ما اكون
حبيبك لو ما بيننا خلاف
و أحلفلِك
بإن مافيش زعل يتشاف
ما دمتى حبيبتى ويايا
و إنك مهما اخطئتي
هسامحك لو ضِحكتيلي
واظُن الضحكة دي كفاية
تحلّي حياتي و سنيني
ده انا من قبل منك تُوهت
و اتوه اكتر
فـ وقت ما فيكي ما بفكر
و ابان مبسوط كما الأطفال
و يغلّبني الحنين اجيلِك
اشوف عينِك .. اتوّه فيها
تقول ساكت !!
اقولِك كان فـ بالي سؤال
و تاه لما ألتقيت بيها
و اداري الصمت فـ جمالِك
و اقول إنك نسيم الليل
و احلىٰ من سُعاد حُسني
و أجمل من غُنا كلثوم فـ ” سيرة الحُب ”
قوليلي ميزان عنيا إزاي
قُصادِك بس مش هيطُُب ؟
اداري إزاي ..!
و طول الوقت انا مبيَّن ..
باتخيّل
شكلك و إنتي بالفُستان
و يعني إزاي
فيه وردة بتبقىٰ كدا بُستان ؟
بحبك بس.. معنى الكلمة ما يكفيش
يجوز الشِعر لو وصفِك
يا ست الحُسن ماينصفكيش
و لو كُل الكلام قُلتُه
قُصاد منك مايوصفكيش
و فـ ختامي
مافيش ولا كلمة فـ كلامي
تليق بجمالِك الفتان
لأول مرة فـ الدُنيا
طير يدخُل قفص فرحان..
#محمد_السكندري ..