انا
انا واحدة عايشه مش هنا
انا جسم موجود للاسف فاقد لروحه وقدره انه يعيش كده
وفي الوضع ده
اضطر غصبا عنه انه يكمل الباقي ف حياته بس من غيرها
انا واحده عايشه ف كل ثانية 100 وجع مضروب ف حجم الزكريات
انا واحدة عايشة بجسم بس
وقلب مات
وبعيش بفوبيا الموت ف كل لحظة تعدي صاحبت خوفي على كل اللي فضلوا بعدها
ما الموت لو خد اقربهم ليك
بيضيع عمرك
وتموت من قبل ما يبدأ ليك مستقبل جاي
تفضل قلقان على اقرب ناس منك حواليك
وكإن طبيعي هييجي عليك يوم من غيرهم
وتتوه من نفسك رافض تقبل واقع ينكر ف وجودهم
ونتيجه لكل اللي هقوله ومن هذا الوقت ده تحديدا بقى وضعي بيوصف ميت حي
ومحدش هيحس بوجعي
ولا يعرف ليه بقى ده وضعي
غير لما يجرب طعم الموت
جربت تموت
انا دقت الموت
انا عشت بموت
جربت تعيش علشان غيرك
جربت تدوق ف معاني النقص
وبرغم انك محتاج تِكْمَل
بتكَمِل كل اللي ناقصهم من اخر جزء اتبقالك
وتعيش فاضي
واهو فرض عليك تقبل راضي
وان قدرك بدِل احوالك
تحمد ربك وتعيش عادي
جرب تتخيل لو ف مكاني وعايش كل اللي انا عشته كان ايه حالك ؟!
جربت تْمَوِت احساسك وتعيش ميت
علشان بقى واجب فرض تكون موجود
ف رقبتك حمل يهد جبال
ووعدت تشيله بقيت عمرك وتكون صابر
وتكمل واجبك للآخر
وان طال صبرك وهمومك وصلت لاخرها
والعجز مكتف كل ما فيك
وبقيت على رغم اللي بنيته عايش مهدود
بتبص عليك
شايف ميت
تجاعيد وشك خافيه ملامحك
لابس ف هموم بتخبي ف جسم الحمل مأتبله ف ضهره
عايش علشان مغلوب امرك
والشَعر ابيض ولساك عايش ف العشرين
فيه يوم من حظك تدخل فيه
وكإنه مثلث برمودا
زود عمرك ف سنين اضعاف
فجأة لقيتك عديت تمانين
من جوا وباهت على براك
ووصلت انك ميت جواك
في يوم واحد تدخله خلاك
هتكمل كل اللي باقيلك عايش على ذكرى اليوم اياه
والحقيقة ان قلبي مات معاها
وان روحي يومها فارقت جسمي رغما عن ارادتي
واللي جاي تفاصيل حكايتي
يوليو الإسود
اليوم التاسع تحديدا
كان الاتنين من ٦ سنين
البيت كان حاسس تقريبا
بتحول جذري هيحصل فيه
والفرحة مش هتطل تاني ف يوم عليه
صحتني يومها انا بدري عشان
هنروح سوا للقاهرة على جامعتي
عندي امتحان تحديد مصير ف حلم عشت انا املي فيه
وبعدها…. عملية اختي ويوم طويل
خلصت انا بدري ف لجنتي
ولقيتها قاعدة ف وقتها مع واحدة عمري ماشوفتها
تحكيلها عني … وايه ناويين عليه
وكمان بتخطط ليا انا هعمل ايه
خدتها ومشينا شوية وفضلت تحكي كلام مفهمتش انه غريب غير بعد ما فؤت
ضحكتي حلوة
ده فلان قالها
قلتلها كتير
قالتلي عارفه دعيت ب ايه
قلتلها ايه
قالتلي قلت يارب راحة من اللي فيه
وكإن باب السما يومها اتفتح علشان ينولهالها راحة متنتهيش
من يومها مت معادش ينفع اني اعيش
بعدها بغبائي انا قلتلها
معلش خلاص هانت واكيد ربك هيحققها
والله انا مش قصدي اءمن دعوتها انا وقتها
كان قصدي اشوف ضحكتها راجعة لوشها
قاطعت ف كلامي انا لحظتها
وقالتلي صحيح … ازاي هتعيشي بعيد عني
قلتلها يا امي تعبت كتير
من بيت مفيهوش غير كل شوية مشاكل فيه
انا هبعد بس هشاركك كل دقيقه معايا انا بالتليفون
ومكالمة فيديو تهون بُعد
ما اكيد هرجع ونعيش مع بعض
ردت بعيون لمعتها دموع
وكإن بُعادي مفوهش رجوع
تفتكري انا هقدر اعيش ف البيت من غيرك جمبي تقويني
ده انا صابرة عشانكم وانتي معايا
وحضنك بيت اسراري انا فيه وهمومي بتطلع وانا جواه
مين بعدك يقدر يواسيني
قلتلها بكل معاني العجز
صبرا وهنرجع من تاني
عدى دقايق ولقيتها قالتلي
صحيح على فكرة انا رايحه لوحدي لخالتك واختك دلوقتي
سبقونى هناك ع المستشفى
وهوصلك انتي وهلحقهم
تخلص عمليتها ونيجي
وهتابعك اول باول بمكالمة وهطمنكم
وهنيجي اوام
هنروح دلوقتي الموقف … تركبي انتي عشان اخواتك وحديهم
قلتلها لا … احنا اتفقنا نروح سوا ونرجع سوا
وبعدين يا ستي ما كلمتيهم ادامي… والدنيا تمام
قالتلي لا… ده قرار وخدته انا مش هطمن غير وانتي معاهم
وكإنها حاسة وقالت تفصلني عن موتي معاها واكمل عايشه لاعيشهم
وحاولت معاها كتير ولكني فشلت
لو كنت اعرف ايه مستنينا نعيشه كمان كام ساعه بتفصلنا
والله ما كنت وافقت … لو حتى عاندت
بعدها روحنا
وركبت ف اخر كرسي انا من جمب الشباك
وقالتلي بآخر نظرة بتجمعنا
وكإنها حاسة وروحها مُصرة تودعني
وعيون لمعتها حنان… مقدرتش احسه انا بعديها
استودعك الله الذي … لا تضيع امانته
وعرفت بعديها ايه سر ان انا عايشه كل العمر ده
والسر ف الستر اللي حاوط سكتي
والدعوة اللي بفضلها … انا عشت باقي دنيتي
ف امانه وحمايته
مِشْيِت ومْشِيت
ووصلت خلاص
جبتلهم اكل ورحت البيت
وبسرعه انا رحت اكلمها
وحكيتلها ايه اللي عملته
وردودي على الناس ف طريقي
ردت بالضحكة وعادت كل اللي انا قلته
وساعتها قالتلها خالتو بعفوية مهي بنتك وضع طبيعي تكون كربون منك
وضحكنا شوية وكانت اختى ف وقتها خرجت م العملية وطالعة بخير
واهي ماما قالتلي شويه تفوق وهنيجي بسرعة مسافة السكة نكون عندك
قلتلها تمام … اشوفكم على خير
من تعبي وهدة حيلي اليوم ده لقيتني بدون ما بحس بنام
وصحيت مفزوعه وعلى غير عادتي قلقت
تليفوني يرن … ايوة يا خالو
لا عادي مفيش حاجه تخوف
انا كلمتها والدنيا تمام
هي بس عشان زعلانه كتير منكم عملت خاصية محدش غيرنا يكلمها
كان رده صالحتها على فكرة وانا كلمتها بس التليفون الان مقفول
ف سكتت بخوف ..
طب لحظه هكلمها واقولك
وقفلت معاه وبسرعة حاولت اكلمها
وانا ايدي اترعشت من خوفي معرفش ده ليه
تليفونها بيدي ازاي مقفول
وكمان خالتو … لا مش معقول
للعلم واكتر للتأكيد
خالتو دي صاحبتها الاقرب ليها من اختها اللي تملي بعيد
ونزلت بسرعه لبيت خالتو
هسأل يمكن في حد هناك هيوصلني
لاخوها اللي عرفت انه معاهم
البيت كان وضعه مريب جدا
وفي حاجه الكل مخبيها
لكن من خوفي انا براقبهم
فجأة لقيت صوت من واحدة … كات قعدت جمبي وملاحظتش
بتقولى الحادثة اكيد هتعدي بخير
تلجت انا جامد لحظتها
ومش فاهمه انا بحلم ولا ده ايه
طب حادثه ايه
ما تردوا في ايه ؟
محدش رد
فجريت عالشارع تايهة كإنه كابوس
مش بس كإن
ده فعلا كان
كلمت انا بابا بسرعه بقوله الحق
بيقولو دي حصلت حادثة محدش راضي يفهمني
طمني
هموت
وجريت عالبيت ف لقيت اخت امي وواحده قريبتي انا عارفاها واقفين عالباب
بتقولي اسكتي ارجوكي امسحي وشك
اخواتك مش لازم يدرو
ومشينا معاهم وانا تايهة
ولا عارفه منين واخدينا لفين
وبدون اسباب
ودونا لبيتها وقفلو الباب
والكل غريب
مش فاهمة انا ايه حاصل طيب والكل مخبي ومبينطقش
وبدون تفاصيل تقهر اكتر
انا فجأة لقيت جاتلي رساله
تليفونها مُتاح
فبرن بسرعه لقيت في واحدة انا معرفهاش
بترد مكانها وعارفاني
قلتلها مين
بتردي ليه
طب ماما واختي وخالتو فين
فقالتلي اختك ف العمليات ادعيلها
ها
طب ماما فين
ردها كان صمت
وبعدها قالت بعياطها
ربنا اختار امانته … ياخدها ليه
بتقولي ايه ؟؟
المشهد هعجز عن وصفه
ف هخطي واكمل ايه بعديه
انا خدت اخواتي
ورحت لبيت خالو الاقرب ليها ولينا
واتاري في مشهد اسوأ هنعيشه كمان مستنينا
الكل مسَوِّد ف هدومه وعياط وصريخ ماليين البيت
مستوعبتش لسه الموقف
ارجوكم لازم حد يوديني انا ليها
انا لازم اشوفها بسرعه … انا هلحقها
وساعتها مكانش ف بالي
غير انها لو حستني معاها بكلمها
هتقوم وترد عليا اكيد
انا واثقة انها مش هتسيبني
هترد عليا تطمني
وتقولي انا مش هقدر اسيبك
ولا هقدر انا ابعد يوم عنك
وتموتي بقهرك ده معايا
اصلها عارفه ان انا عايشه بروحها دي جوايا
مش ممكن تبعد وتسيبني
صممت لحد ما ودوني
انا فاكرة المشهد حتى الان وبعيشه ف كل دقيقة دي بتعدي
مستشفى اسمها ٦ اكتوبر
وطلعت مكان حافظه ملامحه كان اهلي هناك والكل مصمم اني مشوفهاش دلوقتي
واستنى لبعد ما تتغسل
واني اتحمل
والله سمعت كلامهم وانا واثقة
لو يحصل ايه برده هرجعها انا لما هشوفها واكلمها
عدت ساعة وقالولي خلاص تقدري تدخلي سايبنلك وشها تشوفيها
اسوأ مشهد ف حياتي اهو جه
وانا روحي اتسحبت من بعديه
ودخلت عليها لقيتها بتضحك والله
بصيت نحيتها
ساعتها انا بس بدأت اعرف
انها مش راجعه خلاص ليا
وده اخر مشهد يجمعنا
ودي اخر مرة هقول ماما
ودي اول مرة انادي عليكي ومترديش
واخر مرة نتقابل … يكون حضني انا لكفنك
واشوفك نايمة ف الصندوق قصاد عيني
مقفول عليكي ف عربيه كات سبقانا
ودي اطول مرة مشيت ف طريق
كات اطول ساعة ف عمري انا عشتها كل دقيقة كإن سنين
وانا طول السكة بودع روحي انا ادامي
ف طريق وصلتك بيه لمسجد
والناس حوالينا ف كل مكان
جه وقت يصلو عليكي ازاي
انا عايشة بصلي معاكي وبس
ازاي العكس
من توهتي مصلتش معاهم
وجريت عالبيت املي الاقيكي
ودخلت انا اوضتك … بجري عليكي
لقيتني ف وهم
نحذف تفاصيل م الصدمة معدتش فاكراها
اللي انا فاكراه اني معاها
روحها اتبَدَلت من يومها بروحي وعشت انا بعدها جوايا
وماما الله يرحم….ني من بعدها
مش قابلة انا حتى اني استوعب الدعوة دي وانها مش عايشه معايا
ولا قادرة انطقها
او حتى اسمعها انا من مخلوق
انا واثقة خلاص مش هقدر افوق
كل البيبان اتقَفِلت من بعد ما انتي طلعتي فوق
وبعيش بموت ف كل لحظة تعدي وانتي مش هنا
والله ماتت روحي انا
من يومها ضعت
ليك حكمة يارب وعجِّل لاجل انا ماعرفها
انا اصلي تهت
مش طالبة يارب غير اني اكرهها فـ ممكن اعيش
اسحبلي روحها مني بس
غير ملامحي واخفي كل سبيل شبه
او حتى اوهبني البرود لو جيت احن
بطلني احس
واليوم اياه
خليني يارب بأمر مشيئتك اني انساه
وساعتها انا هقدر اني اعيش
الرحمة يارب انا روحي بتنزف م التفكير
وعلاجها ف ايدك متسيبنيش
او حتى يارب تاخدني ليها وتنهي وضع يئست منه ف بُعدها
انا جبت اخري خلاص وتهت وطاقتي وصلت لـ المفيش
معادش ينفع اني اعيش
سرطانها بينهش كل ما فيا انا بعديها
اه
امي دي .. سرطان
مشفتش انا منه
سرطان وصابني ملوش دوا
ولا سابلي فرصه ف اني اعيش
وبينتشر ف الانسجه اللي اتدمرت بلوكيميا موتها ووحدتي
وحاولت كتير اتعالج منها انا بس فشلت
لأ واستسلمت
جربت علاج اشعاعي لكل ما فيا انا من دمك وحاولت يومها بقوتي
يمكن اقدر اني ادمر كل شئ يربطني بيكي
ولسه مصمم يقتلني
جايز اما يموت نخاع مخلوق بريحتك جوا مني
يمكن اقدر اعيش بغيره انا هنتجه
ويجيلي … ومِنَّك ينجدني
والنتيجه بإن جسمي حتى رافض انه ينتج غيره من بعدك
وبيشتهي ريحتك
بقى فرض ليا رجوعه تاني اعيش عليه
سرطان دخل من تاني جسمي بيغزو فيه
ووصلت اخر مرحلة
محكوم عليا انا بيها خلاص مشفاش منك
سرطانك ده اتمكن مني
ومعدتش قادرة اتحكم فيه
واهو حتى انا لما ف يوم جربت علاج اشعاعي بأمل اني اشفى خلاص منك
اهو ضرني اكتر م الاول
مقدرش يعالج بواقيكي
بالعكس ده كمل يومها على الجزء السليم اللي كنت انا عايشه بيه
وانتكاستي انا للمرض بقى امر متوقع رجوعه ومحتمل
وخلاص حصل
محكوم عليا اموت ببطء
محكوم عليا عذاب سنين
طب يرضي مين ؟!
يرضيك يارب
انا اسفه لو بضعف كتير انا بعدها
وبدون تحكم مني مش عايشه برضا
والله غصبًا عني دا
وانت اللي عالم باللي فيا ف بُعدها
اخر طلب منك يارب
في رساله ليها انا عاجزة اقولهالها
ارجوك توصلها
وضروري جدااا هي تعرفها
ورسالتي بتحتوي الآتي
تحية مؤلمة بعدك
واما بعد ..،
صباحك خير بعيد عني
صباحي دام وجع بُعدك
ورغم انك فارقتيني
يا ست الكل
يا اطهر قلب ف الدنيا
وحشتيني
وبستغرب …
ما دام مش قادرة تنسيني
وبتوصي ف خلق الله تكون جمبي برغم رحيلك الجسدي
ما دام روحك مكانها الحالي جوايا
ليه سبتيني ؟!!!
انا والله من بعدك بشوفك لسه باقيالي
وعايشة انا بس لارضيكي
يمين الله وحشتيني
وحشتيني
ورغم ده مش مسامحاكي
لا عالكسرة اللي قطمت ضهري من بعدك
وفرض عليا اعيش بيها
طبيعي مفيش حاجه اتكسرت هتتصلح وترجع عادي كالأول
وتستحمل
ولا عالحوجه اللي عرفت معناها لأول مرة من بعدك
بكون فيها
لو كنتي يعني مسيبتنيش
كان مستحيل يجيلي يوم وادوق معاني الاحتياج
كان مستحيل ينقصلي شئ وانتي معايا مسيبتنيش
م المستحيل تكمللي فرحه انا بعد ما انتي طلعتي فوق
م المستحيل اصلا هفوق
م المستحيل جدااا هعيش
معادش ينفع اني اعيش
معادش ينفع اني اعيش
#الشاعرة_بنت_الملكة
#تقى_محمد