أنا المسجون أسير خوفى
نقشت الاهه فى حروفى
أنا العاشق لنبض حياة
وحابس لهفتى فى جوفى
وكل نهار أقول هأقدر
و هافرد على المدى طيفى
وهأزرع ألف نجمة ليل
تنور لى مدد شوفى
ولما الشمس بتودع
أحس عيونها بتدمع
وبغرق فى السما الحمرا
وشمسى تقولى راح ترجع
أضم الاهه فى قلبى
وأعاتب كسرتى وضعفى
وفجأة تدب فيا الروح
وترسم بسمة لشفايفى
أنا المؤمن برب الكون
بمد له كل يوم كفى
أنا العابد وربى عظيم
مسخر كونه فى صفى
أخاف من أيه وهو كريم
رحيم رحمن وبيوفى