– وجعتيني
النَص ده مش شِعر
النَص ده فيه هموم
ناتجه لوجعِي البِكْر
النَص خالي الفِكْر
النَص ده ناتج
لِـ بواقي قلبِي الكَسر
جيت أكسرْه كسرنِي
النَص خسَرني
أحلام كتير مِـ العُمر
ضمّيتها بين روحي
ضمّيتني ضمّة قبر
حبيبتي .. أما بعد
أنتِ وأنا مش لبعض
مابيننا ألف سد وسد
رسمنا طريقنا بالخطوه
حفظنا زمان كام غنوه
وآخرتها فرقنا البُعد
بسم إللّي خلق الحُب
بسم إللّي خلق القلب
هبدأ قصيدتي بـ كُفْر
حُبِك ده أكبر ذنب
وأنا كُنت فيه عاصي
مش طبعِي أكون قاسي
كان نفسِي أحلامِك
تبقيَ علي مقاسي
يجوز سيبتِني أو سيبتِك
يجوز سيبتِك فَـ سيبتِني
عيشت ليكي وعِيشتك
وبضلوعِك دبحتينِي .. وجعتِيني
حبيبتي الغايبه من فتره
أنا نسيتِك على فكره
بقيت واللهِ مش فاكرِك
ولو شوفتِك يوم صُدفه
هـ أخترع وقتها أي كدبه
وهعمل فيها مش عارفِك
زمان أنا كُنت بشبِهلِك
فـ الحنيّه وطيبة الأصل
دلوقتي بقيت كربون تلميذ خايب
فـ آخر تختَه شمال فالفصل
كُنت معاكِي شبه عيل
فرحان بالحاجه في أولها
وقت تعبي عليكي أميّل
وعمري ما كُنت بـ أحسبها
كات كُل الناس لما تشوفني
يقولولي حبيبتَك تشبْهلَك
دلوقتي بقيت بشبِه جداً
للوجع الحاضن تنهيدتِك
بس أنتِ فجأه غيبتي
وليا سيبتي حاجات كتير متلغبطه
وكام سؤال إجابتهم دايماً متشتته
كُنت أسهر أغنى لِك
مع إن فـ صوتي نشاز
آمنت بإن الصُدفه دي شئ إعجاز
حُبِك ليه يبقي مَجاز ؟
صدقت كلام أتقال أمثال :
أنَّ الصُدفه بألف ميعاد
حُضنِك كان فيلم قديم متْعاد
كتبت الشِعر فيكي زمان
وكُل مكان سوا روحناه
أقسمت 100 يمين ويمين
إن أنتِ وجودِك ليا حياه
ليه أغرق على إيديكي !
بعد أما كُنتِي طوّق نجاه
لو قولت فـ شِعري يوم موجوع
الناس من وجعي تقول الله
بعد أما كُنتي أنتِ الحبيبه المُلهمه
فجأه بقيتي كُل الحاجات المؤلمه
جوايا سيبتي جراح كتير معلمّه
أنا أسف لـ قميصِك عالدمعه
كان سببها الجرح إياه
رديتي الدمعه بجرح كبير
وقلبي مقالش حتى آه
فيه كام سؤال ملهُمش إجابه مُمكنه
– ليه يعني كُل ما زاد الحُب بيزيد مُعدل الغباء !
– وليه دايماً كُل الحكايات آخرتها بتكون فُراق!
مين ساب التاني مهيش فارقه
لو حد سألني هـ أقول سيبتِك
يحرَم علي حُضني فـ يوم حُضنِك
أو قلبي يجيب أبداً سيرتِك
#وجعتينِي
#Ahmed_Saleh