على طبلية الحاجه عادل حراز يكتب : المشكله في الفونيـــــــــا !!

0

المشكله في الفونيا … الوطن زى بابورالجاز , وعشان البابور ده يشتغل لازم تحطله جاز … سيادتك مليت البابور جاز فعلا وعمال تشتغل بكل قوه واخلاص وبتدى البابور ده نَفَس بالكباس .. لكن فونية البابور بتنفس علشان كده البابور مش بيولع …صح ؟؟

وعمال يهبب يمين وشمال والجاز بيطلع علي الفاضى .
فونية بابور جاز الوطن لازم تتغير لانها بتسرب جاز ومبهدله الدنيا.
عارف سيادتك الفونيه دى هم كثير من القيادات الصغيره مش الكبيره اللي في المصالح الرسميه علي كل المستويات … لان معظمهم اتربي وعاش واتعلم علي انه ينفس ويسرب جاز وهم علي يقين ان ده هو الصح …!!
تغيير الفونيه امر ساهل وبسيط علي رأى عم منعم السمكرى … فيه ناس بتخاف تغيير الفونيه او بمعنى ادق بتستخسر تغيير الفونيه القديمه من منطلق الفونيه اللي تعرفها خير من الفونيه اللي ماتعرفهاش , تقوم تعمل ايه ؟
تخلي منعم السمكرى يقوم بتنظيف الفونيه يعنى ينفخ فيها بكباس الهواء ..هي بتشتغل يومين تلاته وترجع تبوظ تانى رغم إن منعم بينبه علي ده ويقول غيروا الفونيه كل 6 شهور علي الاقل .
مصر محتاجه تغيير في فونية بابور جازها … جرب سيادتك وغير كل الفونيات اللي بتسرب بفونيات شبابيه جديده ..خلينا نجرب ونشوف يمكن نصيحة منعم السمكرى تجيب نتيجه..ليه لاء !
اصلح بابور الجاز ..!!!!!!!!!!!!!!
نداء انقرض من مصر المحروسه… نطالب بعودته مره أخرى قبل انفجار البابور !

اترك تعليق

يرجي التسجيل لترك تعليقك

شكرا للتعليق