عادل حراز يكتب : الفسيخ والشربات

0

بيعمل من الفسيخ شربات !! كانت دايما دى كلمة الحاجه أم جدتى … اخر غصن في شجرة الياسمين طرح فرعين جدتى وامى الله يرحم الجميع ..هي كانت عمود الخيمه بتاع العيله .. جامعة ولا جامعة السربون في الفلكلور والحكاوى والامثله الشعبيه ..بين كل كلمه وكلمه لازم تقول مثل شعبى …وان مقالتش تقول بعينيها…وآه من كلام عينيها ..هي نظرة واحد هبس تلاقي كله تمام وتحت السيطرة . كان عندى يوميها خمس سنوات كنت بحس ان حضنها الكبير ممكن يساع كل اهل اسكندريه والصعيد… كان حضن فيه ريحة الطيبه والحنيه والحنان والعطف والموده والرحمه والا نسانيه وفوق كل ده كان حضن يقوى ظهرك لما كانت تطبطب علي الكبير ولا علي الصغير تحس ان اللي طبطبت عليه ده تحول من ارنب الي اسد !!كانت تقول كلمه واحده بس بالصعيدى ( شد حيلك ياولّد ) بتشديد اللام . كنت اول مره اسمعها تقول ده الحاج ابوعبده النمس طول عمره هجاص يعمل من الفسيخ شربات!!! انا ببرائه صدقت انه فعلا ممكن يعمل من الفسيخ شربات , إترميت فى حضنها بفرحة شديده وقلتلها والنبى يا ( نينا ) خليه ييجى يعملنا الشربات ده !!! كان ابو عبده النمس هو الجار السو وكانت دايما لما تشوفه ماشى تقولهاله في وشه اصبر علي الجار السو يا يرحل يا تجيله مصيبه . المهم خدنى فضول الاطفال واصريت اعرف خكاية لفسيخ اللي بيتعمل منه الشربات. وبدأت نينا تحكى : هو نوعين : الاول : لما يبقي الفاشل والعبيط والاهبل متصدر المشهد ويقعد يكدب ويصدق كدبه والناس تطبله وتصدقه والناس اللي عارفه الحقيقه تهمس بينها وبين نفسها وتتمألس علي الناس اللي بتطبل ويقولوا عليهم : دول بيعملوا من الفسيخ شربات ! الثانى : لما يبقي حد بجد وشاطر وواعى وشايف شغله ومافيش حاجه بتغلبه في الدنيا برضه يتقال عليه ده بيعمل من الفسيخ شربات..يعنى حتى لو الشاطر ده بيبيع فسيخ بيبقي طعمه زى العسل وميته احلي من الشربات ! افتكرت الحكاية دية وانا ببص علي المشهد العام في هذه الايام . انا علي يقين من ان فيه ناس كتير قلبها علي البلد وبتعمل فعلا من الفسيخ شربات بس بالطريقه التانيه بتاعة الاذكيه . وفيه ناس زى الجار السو ابو عبده النمس كلهم في الهجايص بيعملوا من الفسيخ شربات! هناك فرق كبير بين الفسيخ ده والفسيخ ده ..وبين الشربات ده والشربات ده ! خليك في شربات مصر مش هتندم ! اوعى تسمع لابو عبده النمس لانه الجار السو مصر لسه فيها ناس شربات .رغم الالم اللى حاصل .

اترك تعليق

يرجي التسجيل لترك تعليقك

شكرا للتعليق