اسامه عبدالعزيز يكتب : بلاها شعر

0

بَلَاها الشِعر
لو يعني عشان أوصل هـ أبيع روحي
بَلَاها الشُهرَه
لو نالت فــ يوم مني وخَطّفت صِدقي ووضُوحي
ما لو غَيّرت لون جِلدي عشان أعجب جميع الناس
هــكون الة نِفاق دَايرَه بدون إحساس
وكُل قَصيده تتدوّن
جَنين الكدب يتكوّن
وشوش الروح هتتلوّن
ساعات ثوري ساعات وطني ساعات هلاس
وده إحساس مُميت جدًا
يزوّد ذنب فــ ذنوبي
يوماتي القلب راح يدّن
بإني خَرجت من توبي
صَبحت رخيص
بجامل ناس يجاملوني
بكلام تهجيص
ولو هـ ألبس قِناع عِفَّه والألأ فيه
بَلَاها الفيس
عشان حوّلنا ببَراعتُه وبقينا مِسوخ
وفارش كله ببضاعتُه ف رصيف الروح
بنتجمِّل عشان نِرضي الجميع واحنا
حاولنا نرُم أوجاعنا فــ زوّدنا فــ كُسورنا شروخ
بَلَاها نبوح
عشان لو بوحنا بالمستور
هنطفي النور علي الذكرى
ونقتل فينا أحلانا ونلبس وش
ملامحُه تكش فــ الوحده
وتفرد روحها فــ الأحزان
ماهي الشكوى ل 100 إنسان
أخرها بتتسمّع معلش
بَلَاها الغش
عشان أخرُه فــ ناس بتموت
ده غير مُوتها الطبيعي أكيد
ما ياما ناس عاشت فينا
ماعاد منها إلا شاهد موت
بَلَاها الصوت
سيبوني فــ دُنيتي وإمشوا
وانا هأبقي بطبيعتي تمام
انا أسف عشان فضفضت
انا أسف سنين قُدام
بَلَاها كلام
عشان همي مكفّيني
نزلتوا صراحه من عيني
فــ مش أسف وداخل أنام
#اسامة_عبدالعزيز

اترك تعليق

يرجي التسجيل لترك تعليقك

شكرا للتعليق