احمد طرابيه يكتب : شبح طيب

0

مكنتش تقصد تنغرس فيا
فتعيش ف جسمي جرعة من نيكوتين
وما كونتش اقصد اموت وانا بدونها
لكن بدونها ليه اعيش.. ولمين

قتلنا بعض بقصة مش هتموت
وقتلنا بُعد وكان بـ ده مبسوط
بس السؤال ليه اما شوفتك بيت
لقيته فجأة من خيوط العنكبوت

كان م الطبيعي لما اشوف عينك
القاني حابب اقولك ازيك
القاني حابب اقربك ليا
كان مش طبيعي يا فرحتي وحزني
انك توافقي نكون عشان مانكونش
وتسيبي ذكري جميلة مؤذية

لسّاني كل ما اصلي بدعيلنا
يارب اجمع شملنا مع بعض
مش عارف انسي او مانيش عايز
تصديق لفكرة اننا فى البعد

كان م الطبيعي احبها وما اخافش
ودي بنت تشبه ممشي جنب البحر
قهوة ف صباح بيشوبه بعض الحزن
فرحة وحيد بيلاقي مرة الحضن
او مغترب طالع خلاص بيته..
وبيلمح امه واقفة في الشباك
اللهفة كل ما يطلع السلم
بتوازي شهرين جوه غُربة هناك
ودي لهفتي كل اما اشوف صورتك
بس الحزين اني مانيش هحضنك
وهقضي باقي العمر في الغربة
يكفيكوا شر تحول العشاق
من نعمته الي شدة الكربة

مكنتش تقصد تنتزع مني
ف تموت في جسمي ورود واغنيات
وتعيش ف روحي اماني ما اكتملتش
واقضي باقي العمر بشحت ود
واموت يوماتي كل ما القاها
خارجالي م الاحلام بتضحكلي
او من سجايري ف صورة الدخان

مبقتش عارف هى غلطة مين
هل كان غبائى ولا سوء حظى
أم انها أطباع حياة ساخرة
بس اللي عارفه وهو عندي يقين
اني بقيت اشبه شبح طيب
واني لا اصلح لعلاقات اخري

اترك تعليق

يرجي التسجيل لترك تعليقك

شكرا للتعليق